Saudiya Arabistoni Suriya iqtisodiyotiga 4 mlrd dollar sarmoya kiritishini ma’lum qildi. Bu haqda The National xabar berdi.
Suriya poytaxti Damashqda bugun, 23-iyul kuni Suriya—Saudiya investitsiya forumi bo‘lib o‘tmoqda. Shu tadbir doirasida ikki mamlakat o‘rtasida 4 milliard dollar (15 milliard rial) miqdorida investitsion kelishuv imzolanishi rejalashtirilgan.
Saudiya investitsiya vazirligining bildirishicha, forumda davlat va xususiy sektorning keng ishtiroki ta’minlangan. Ushbu harakat Suriya bilan iqtisodiy munosabatlarni yaxshilashga qaratilgan bo‘lib, tomonlarga hamkorlik imkoniyatlarini o‘rganishga yordam beradi. Bundan tashqari, u barqaror rivojlanishga ko‘maklashuvchi kelishuvlar imzolanishiga turtki bo‘ladi.
Saudiyaning yuqori darajadagi delegatsiyasiga mamlakat investitsiya vaziri Xolid al-Falih boshchilik qilmoqda. Delegatsiya tarkibiga turli sohalardan 120 dan ortiq investorlar jalb qilingan. Shuningdek, forumda qo‘shma loyihalar va ikki tomon o‘rtasida anglashuv memorandumlari imzolanishi kutilmoqda.
Sana nashrining xabar qilishicha, kelishuv doirasida Damashqdagi Adra sanoat shaharchasida Fayhaa sement zavodi loyihasi ishga tushiriladi. Bu sement ishlab chiqarishni kengaytirish va mamlakatni qayta tiklashni qo‘llab-quvvatlaydi.
Fors ko‘rfazi davlatlari Suriyada Bashar Asad rejimi qulaganidan so‘ng, mamlakatga sarmoya kiritishga harakat qilmoqda. Xususan, Saudiya Arabistoni va Qatar birgalikda Suriyaning Jahon banki oldidagi 15,5 million dollarlik qarzini to‘lab bergan. 2025-yil may oyida Qatarning UCC Holding kompaniyasi Suriya iqtisodiyotiga 7 milliard dollarlik investitsiya kiritgan. Bu mamlakatning urushdan keyingi iqtisodiyotini jonlantirish uchun energiya ta’minotini ikki baravar oshirishga qaratilgandi. Shuningdek, Dubayning DP World kompaniyasi Suriyadagi Tartus portini rivojlantirishga 800 million dollar ajratgan.
Izoh (0)