Janubiy Koreyada yarim yillik siyosiy larzalardan so‘ng 3-iyun kuni prezidentlik saylovi boshlandi. Bu haqda Yonhap xabar berdi.
Mamlakat aholisi taxminan 52 million kishini tashkil etadi. Saylov komissiyasi ma’lumotlariga ko‘ra, taxminan 44,4 million kishi ovoz berish huquqiga ega. 29-may kuni ikki kunlik muddatidan oldin ovoz berish boshlangan. Unda 15 milliondan ortiq saylovchi ishtirok etgan. Shuningdek, 20—25-may kunlari xorijda muddatidan oldin ovoz berish bo‘lib o‘tgan.
Koreyada prezidentlik saylovi sobiq rahbar Yun Sok Yolning (“Xalq kuchi” partiyasidan) impichmenti tufayli rejalashtirilganidan ikki yil oldin bo‘lib o‘tmoqda.
Saylovdagi nomzodlar
Saylov byulletenida beshta nomzod borligiga qaramay, asosiy raqobat uchta nomzod o‘rtasida bo‘lishi kutilmoqda. Ular haqida nimalar ma’lum:
Li Chje Men — 61 yoshda, “Toburo” liberal-demokratik partiyasidan nomzod. Chunan universitetida huquq bakalavri va Gachon universitetida davlat boshqaruvi magistri darajasini olgan. 2010—2018-yillarda Sonnam shahri meri, 2018—2021-yillarda Kengido provinsiyasini boshqargan. Lining tashabbuslari orasida prezidentlik muddatini qayta saylanish imkoniyati bilan qisqartirish va davlat rahbarining veto huquqini cheklash, ish haftasini qisqartirish, pensiya yoshini oshirish va ota-onalar uchun soliq imtiyozlarini joriy etish kabilar bor.
U AQSH va Yaponiya bilan hamkorlikni davom ettirish niyatida, shu bilan birga, Xitoy va Rossiya bilan munosabatlarni saqlab qolish muhimligini ta’kidlamoqda.
Kim Mun Su — 73 yoshda, konservativ “Xalq kuchi” partiyasidan nomzod. Seul universitetini Biznes boshqaruvi mutaxassisligi bo‘yicha tamomlagan. 2006—2014-yillarda Kengido provinsiyasi gubernatori bo‘lgan. Uning tashabbuslari orasida parlament a’zolari sonini 300 nafardan 270 nafarga qisqartirish va deputatlik daxlsizligini bekor qilish bor. Biznes uchun qulay sharoitlar yaratish va o‘rta sinfga soliq yukini kamaytirishga e’tibor qaratadi.
Shuningdek, elektr energiyasini arzonlashtirish uchun atom energetikasini rivojlantirishni qo‘llab-quvvatlaydi. KXDRga nisbatan Kim oldindan tiyib turish siyosati va AQSH bilan harbiy ittifoqni mustahkamlash, jumladan, mamlakat hududida Amerika taktik yadro qurollarini joylashtirish tarafdori.
Li Chjun Sok — 40 yoshda, konservativ “Yangi islohotlar partiyasi” nomzodi. Garvard universitetini Informatika va iqtisodiyot mutaxassisligi bo‘yicha tamomlagan. 2021-yilda u “Fuqarolik kuchi” partiyasi raisi lavozimini egallagan, biroq keyinchalik tasdiqlanmagan poraxo‘rlik gumonlari tufayli tez orada ishdan bo‘shatilgan.
Hokimiyatni nomarkazlashtirish, halol raqobat va biznes uchun ma’muriy to‘siqlarni kamaytirish tarafdori. U Gender tenglik va oila vazirligi hamda mamlakatdagi feministik tashkilotlar faoliyatini tanqid qiladi. Tashqi siyosatda u AQSH bilan strategik hamkorlikni rivojlantirish va KXDR bilan munosabatlarda pragmatik yondashuv tarafdori.
Kim g‘alaba qozonishi mumkin?
Sotsiologlar saylovlarda Li Chje Myon g‘alaba qozonishini prognoz qilmoqda. So‘nggi so‘rovlarga ko‘ra, uni 49,2 foiz saylovchilar qo‘llab-quvvatlamoqchi, Kim Mun Suga esa 36,8 foiz ovoz berishmoqchi. Li Chjun Sok 10,3 foiz ovoz olishi kutilmoqda.
Saylov g‘olibi juda tez ko‘plab jiddiy muammolarga duch keladi. Meningcha, bo‘lajak prezident avvalo Tramp bilan muloqot qilishiga to‘g‘ri keladi va o‘z siyosatini aynan shunga qarab yuritishga umid bog‘lashi kerak, deya prognoz qiladi Seuldagi Kyong Xi universiteti tashqi siyosat professori Chu Chje Vu.
Janubiy Koreya uchun eng jiddiy muammolar — mamlakat mahsulotlari eksportiga AQSH tomonidan joriy etilgan bojlar hamda ikki tomonlama harbiy ittifoqdagi o‘zgarishlar, xususan, Amerikaning Koreyadagi harbiylari masalasidir.
Izoh (0)