Markaziy Osiyo davlatlari tashqi ishlar vazirlari Hindistonda uchrashadi

Markaziy Osiyo davlatlari tashqi ishlar vazirlari 5—6-iyun kunlari Hindistonda uchrashadi. Bu haqda Economic Times xabar berdi.

Ma’lum qilinishicha, Nyu Dehli Markaziy Osiyoning beshta tashqi ishlar vazirini qabul qiladi. 5—6-iyun kunlari “Hindiston—Markaziy Osiyo” forumi bo‘lib o‘tadi. Uchrashuvga tayyorgarlik doirasida Hindiston tashqi ishlar, atrof-muhit, o‘rmon xo‘jaligi va iqlim o‘zgarishi vaziri Kirti Vardxan Singx Markaziy Osiyo respublikalarida bo‘lib turibdi.

5-iyun kuni “Hindiston—Markaziy Osiyo” biznes forumi bo‘lib o‘tadi. 2020-yilda boshlangan forum Hindiston va Markaziy Osiyoning beshta davlati — Qozog‘iston, Qirg‘iziston, Tojikiston, Turkmaniston va O‘zbekiston o‘rtasidagi savdo, sarmoyaviy va iqtisodiy hamkorlikni rivojlantirish uchun asosiy institutsional platformaga aylangan.

Hindiston bosh vaziri Narendra Modi boshchiligidagi “Hindiston—Markaziy Osiyo” sammiti ilk bor 2022-yil 27-yanvar kuni bo‘lib o‘tgandi. O‘shanda Markaziy Osiyo prezidentlari COVID-19 pandemiyasi cheklovlari tufayli Hindistonga bormagandi, muzokarlar virtual formatda tashkil etilgandi.

Oliy darajadagi virtual uchrashuv ko‘p tomonlama munosabatlarni yanada kengaytirish, mintaqaviy aloqalarni mustahkamlash, barqarorlik va izchil taraqqiyotni ta’minlash masalalariga bag‘ishlangandi. Sammitda uzoq muddatli sherikchilikni mustahkamlashga qaratilgan Dehli deklaratsiyasi qabul qilingandi.