Марказий Осиё давлатлари ташқи ишлар вазирлари 5—6 июнь кунлари Ҳиндистонда учрашади. Бу ҳақда Economic Times хабар берди.
Маълум қилинишича, Нью Деҳли Марказий Осиёнинг бешта ташқи ишлар вазирини қабул қилади. 5—6 июнь кунлари “Ҳиндистон—Марказий Осиё” форуми бўлиб ўтади. Учрашувга тайёргарлик доирасида Ҳиндистон ташқи ишлар, атроф-муҳит, ўрмон хўжалиги ва иқлим ўзгариши вазири Кирти Вардхан Сингх Марказий Осиё республикаларида бўлиб турибди.
5 июнь куни “Ҳиндистон—Марказий Осиё” бизнес форуми бўлиб ўтади. 2020 йилда бошланган форум Ҳиндистон ва Марказий Осиёнинг бешта давлати — Қозоғистон, Қирғизистон, Тожикистон, Туркманистон ва Ўзбекистон ўртасидаги савдо, сармоявий ва иқтисодий ҳамкорликни ривожлантириш учун асосий институционал платформага айланган.
Ҳиндистон бош вазири Нарендра Моди бошчилигидаги “Ҳиндистон—Марказий Осиё” саммити илк бор 2022 йил 27 январь куни бўлиб ўтганди. Ўшанда Марказий Осиё президентлари COVID-19 пандемияси чекловлари туфайли Ҳиндистонга бормаганди, музокарлар виртуал форматда ташкил этилганди.
Олий даражадаги виртуал учрашув кўп томонлама муносабатларни янада кенгайтириш, минтақавий алоқаларни мустаҳкамлаш, барқарорлик ва изчил тараққиётни таъминлаш масалаларига бағишланганди. Саммитда узоқ муддатли шерикчиликни мустаҳкамлашга қаратилган Деҳли декларацияси қабул қилинганди.
Изоҳ (0)