Toshkent shahri Mirobod tumanida YPX inspektorini avtomobilda urib yuborib, uning o‘limiga sabab bo‘lgan voyaga yetmagan shaxsga nisbatan qamoqqa olish tarzidagi ehtiyot chorasi qo‘llandi. Bu haqda Bosh prokuratura axborot xizmati ma’lum qildi.
Ma’lumotlarga ko‘ra, 2010-yilda tug‘ilgan, maktabning 10-sinf o‘quvchisi Doniyor Turg‘unov 25-fevral kuni soat 21:30 larda tanishining opasiga tegishli bo‘lgan BMW avtomashinasini avtomobil yuvish shoxobchasidan xodimlarni ogohlantirmasdan olib chiqib ketgan.
U Mirobod tumani Nukus ko‘chasida harakatlanayotganda transport oqimini tartibga solish maqsadida to‘xtash ishorasini bergan YPX inspektori, kichik serjant Hosilbek Eshnazarovning qonuniy talabiga bo‘ysunmagan. Aksincha, boshqa transport vositalarini xavfli tarzda aylanib o‘tib, inspektorni qasddan urib yuborgan va voqea joyidan harakatini davom ettirgan.
Og‘ir tan jarohatlari olgan Hosilbek Eshnazarov shifokorlar sa’y-harakatiga qaramasdan komadan chiqmay vafot etgan. Dastlabki tergov hujjatlariga ko‘ra, gumonlanuvchining harakatlarida transport vositasini olib qochish hamda jabrlanuvchining o‘limiga sabab bo‘lgan qasddan og‘ir tan jarohati yetkazish alomatlari aniqlangan. Shu asosda u Jinoyat kodeksining 267-moddasi 1-qismi va 104-moddasi 3-qismi “d” bandi bilan gumon qilinuvchi sifatida jalb etilgan.
