Angliyaning “Tottenhem” klubi vakillari Madridning “Atletiko” jamoasi bosh murabbiyi Diego Simeone bilan aloqaga chiqqan. Bu haqda Indykaila News nashri xabar berdi.
Manbaga ko‘ra, argentinalik mutaxassis London jamoasiga 2026-yilning iyun oyidan boshlab ish bo‘yicha har qanday taklifni ko‘rib chiqishga tayyor ekanini ma’lum qilgan.
Avvalroq “Tottenhem” 2025-yil yozidan buyon jamoani boshqarib kelgan Tomas Frankni iste’foga chiqargan edi. Simeone esa “Atletiko”da 2011-yildan beri bosh murabbiy sifatida faoliyat yuritib kelmoqda.
Joriy mavsum Angliya Premyer Ligasining 26-turidan so‘ng “Tottenhem” 29 ochko bilan turnir jadvalida 16-o‘rinni egallab turibdi. Keyingi turda “shporlar” o‘z maydonida “Arsenal”ga qarshi bahs olib boradi.
“Atletiko” esa Ispaniya La Ligasida 23 ta uchrashuvdan so‘ng 45 ochko jamg‘argan holda turnir jadvalida “Barselona” va “Real Madrid”dan keyin 3-o‘rinda bormoqda.
Ma’lumot uchun, 55 yoshli Diego Simeone dunyoning eng ko‘p maosh oluvchi murabbiyi hisoblanadi. Argentinalik mutaxassis Madridning “Atletiko” klubida yiliga 30 million yevro ishlab topadi.
