O‘zbekiston milliy terma jamoasi va Angliyaning “Manchester Siti” klubi himoyachisi Abduqodir Husanov “Setanta Sports Uzbekistan”ga bergan intervyusida o‘zining bugungi holati, faoliyatidagi muhim lahzalar va nima uchun aynan 45-raqamni tanlagani haqida so‘zlab berdi.
Jarohat xavotiri va jismoniy holat
So‘nggi uchrashuvda zaxiraga olingani muxlislarda turli xavotirlarni uyg‘otgan edi. Husanov bu borada barchani xotirjam qildi:
“Hammasi yaxshi, Xudoga shukur. Hozirgi tig‘iz taqvimda oilam va jamoadoshlarimning qo‘llab-quvvatlashi menga katta kuch bermoqda”.
Nima uchun 45-raqam?
Ko‘pchilik bu raqamni Balotelli bilan bog‘lasa-da, Abduqodirning tanlovi boshqa sababga ega. Futbolchi professional faoliyatini Belarusning “Energetik-BGU” klubida aynan shu raqam ostida boshlaganini va bu u uchun omadli ekanini ta’kidladi.
“Bu shunchaki tasodif. Men Belarusda, ‘Energetik-BGU’ safida professional futboldagi faoliyatimni aynan 45-raqamda boshlaganman. Shu sababli bu yerda ham o‘sha raqamni tanladim”.
“Terma jamoa va xalq quvonchi”
O‘zbekiston milliy terma jamoasining so‘nggi yillardagi muvaffaqiyatlari va tarixiy natijalari haqida gapirar ekan, Abduqodir asosiy e’tiborni xalqning xursandchiligi bilan bog‘ladi:
“Jahon chempionatiga chiqqan paytimizda xayolimga kelgan birinchi narsa, 38 millionlik O‘zbekiston aholisini xursand qilganimiz bo‘ldi. Mamlakatimizda futbolga e’tibor juda yuqori darajada. Prezidentimizning shaxsan o‘zlari yordam beryaptilar, natijada o‘zbek futbolida katta o‘sish kuzatilmoqda”.
Blitz-savollarga qisqa javoblar:
- Sevimli pozitsiyasi: Markaziy himoyachi.
- Ideal sherik: Fabio Kannavaro (tarixdagi himoyachilar orasidan).
- Eng yaxshi atmosfera: “Lans” stadioni (“Etihad”dan tashqari).
- Eng esda qolarli o‘yin: “PSJ”ga qarshi (“Lans” tarkibida).
“Agar jamoamiz yutqazayotgan bo‘lsa — hal qiluvchi golni urishni tanlayman. Agar yutayotgan bo‘lsak — to‘pni darvoza chizig‘idan qaytarib qolishni afzal ko‘raman”.
Intervyu yakunida Abduqodir o‘zining fe’l-atvoriga sodiq qolgan holda, ommaviy axborot vositalari bilan muloqot qilish u uchun biroz mushkul ekanini hazil bilan tushuntirdi.
“Meni bu intervyuga ham zo‘rg‘a ko‘ndirishdi. Bu gaplarim bir yilga, balki uch yilga yetadi”, deya suhbatni yakunladi o‘zbekistonlik legioner.
