Rossiya qo‘shinlari Xarkov viloyatidagi yo‘lovchi poyezdiga dronlar bilan zarba berdi. Hujum oqibatida kamida besh kishi halok boʻldi. Bu haqda Xarkov viloyati prokuraturasi xabar berdi.
Zarba berish uchun Eronnning Shahed tipidagi uchta dron qo‘llanilgan.
Tergov ma’lumotlariga ko‘ra, hujum Barvinkovo hududiy jamoasiga qarashli Yazikovoye qishlog‘i yaqinida sodir bo‘lgan. Nishonga Chop — Xarkov — Barvinkovo yo‘nalishida harakatlangan yo‘lovchi poyezd olingan. Dronlardan ikkitasi poyezd yaqiniga, bittasi esa to‘g‘ridan-to‘g‘ri vagon ichiga kelib urilgan. Bu esa vagon va elektrovozda yong‘in chiqishiga olib kelgan.“Besh kishining jasadi bo‘laklari topildi. Halok boʻlganlarning shaxsini aniqlash faqat DNK ekspertizalari o‘tkazilgandan keyingina mumkin bo‘ladi”, dedi prokuratura.
Xarkov viloyati harbiy ma’muriyati rahbari Oleg Sinegubov poyezd Barvenkovo jamoasi hududida zarbaga uchraganini tasdiqladi. “RBK-Ukraina” xabariga ko‘ra, hujum vaqtida poyezdda 291 nafar yo‘lovchi bo‘lgan. Ukraina prezidenti Vladimir Zelenskiy hujumga uchragan vagonda 18 kishi bo‘lganini, ulardan bir nechtasini qutqaruvchilar qidirishda davom etayotganini aytdi.
Zelenskiy Rossiyaning harakatlarini terrorchilik akti deb atadi va “bu Yevropada ham, Amerikada ham, arab dunyosida ham, Xitoyda ham, boshqa joyda ham kvalifikatsiya qilinishiga shubha bo‘lmasligini” ta’kidladi.
“Tinch aholini yo‘q qilish uchun hech qanday harbiy maqsad yo‘q va bo‘lishi mumkin emas”, dedi u.
Ukrainada zarbaga uchragan poyezdda harbiylar ham, tinch aholi vakillari ham bo‘lgan. Yo‘l davomida poyezd to‘xtagan va aynan shundan so‘ng u dron hujumiga uchragan. Bu haqda Hromadske nashriga poyezd yo‘lovchilari orasida bo‘lgan harbiylardan biri ma’lum qilgan.
“Eshitgan suhbatlarimdan kelib chiqib aytsam, bu hujum oldindan rejalashtirilgandek tuyuladi. Poyezd nima uchundir Yazykove bekatiga yetib bormasdan to‘xtadi. Aynan shu paytda ‘Shahed’ droni harakat tarkibining o‘rtasiga kelib urildi”, degan harbiy.
