O‘zbekistonda oltin quymalar narxi pastladi

O‘zbekistonda 19-yanvar kuni oltin quymalar narxi pastladi. Bir gramm oltin narxi 1 million 827 ming so‘mni tashkil etdi.

Markaziy bank ma’lumotlariga ko‘ra, oltin quymalar narxi quyidagicha belgilandi:

• 5 gramm — 9 mln 139 ming so‘m;
• 10 gramm — 18 mln 277 ming so‘m;
• 20 gramm — 36 mln 554 ming so‘m;
• 50 gramm — 91 mln 386 ming so‘m;
• 100 gramm — 182 mln 772 ming so‘m.

O‘zbekiston Markaziy banki 5-yanvardan oltin quymalarini qaytarib sotib olish narxlarini e’lon qilishni boshladi. Uni qaytarib olish narxlari esa qadog‘i butligi yoki buzilganiga (texnik talablarga mos kelmaydigan holatda bo‘lganiga) ko‘ra farqlanadi.

2026-yil 12-yanvar kuni 5 grammli oltin quyma narxi birinchi marta 9 million so‘mdan oshgandi. 13-yanvar kuni oltin quymalar narxi yana 2,3 foizga oshib, 5 grammli quyma narxi 9 million 215 ming so‘mni tashkil etgandi.

Jahon bozorida esa oltin narxi ko‘tarildi. 19-yanvar kuni u 1,6 foizga o‘sib, bir unsiya uchun 4 666,11 dollarni tashkil etdi. Oltin narxi bilan birga kumush narxi ham oshdi. Bunga AQSH prezidenti Donald Trampning Grenlandiya ustidan nazorat o‘rnatish masalasida Yevropa davlatlariga qo‘shimcha bojlar joriy etishi sabab bo‘ldi.