O‘zbekiston terma jamoasi sardori Eldor Shomurodov Birlashgan Arab Amirliklarida o‘tayotgan “Al Ain Cup” musobaqasi yarim finalidan o‘rin olgan Misrga (2:0) bahsdan keyin o‘yin haqida o‘z fikri bilan o‘rtoqlashdi.
“Birinchi bo‘limda ustunlik biz tomonimizda edi. Ikkita yoki undan ham ko‘proq gol urish imkoniyati bo‘ldi. Dastlabki bo‘limni g‘alaba bilan yakunladik, ikkinchi bo‘limda esa himoyaga ko‘proq e’tibor qaratdik. Raqib taktikasini o‘zgartirdi, shuning uchun bo‘lim boshida tashabbusni ularga berdik. Lekin eng muhimi — gol o‘tkazib yubormadik. Vaziyatlarni golga aylantirishda jiddiy xato bo‘lganini ayta olmayman. Men uchun eng muhimi — imkoniyatlar yaratish. Shu imkoniyatlar bizda bor edi.
Ikki xil taym bo‘ldi. Birinchi bo‘limda bosim orqali tashabbusni o‘zimizda ushlab turishga harakat qildik, tanaffusdan keyin esa himoyaga e’tibor qaratdik. Hozirgi zamonaviy futbolda har narsaga tayyor bo‘lish kerak. Himoyada ham, hujumda ham bir xil harakat qilmasa, ba’zi o‘yinlarda qiyinchilik bo‘ladi. Shu sababli hamma narsaga tayyor bo‘lishimiz lozim”, dedi Shomurodov.
Eslatib o‘tamiz, O‘zbekiston hamda Misr jamoalari o‘rtasidagi bahsda “oq bo‘rilar” 2:0 hisobida g‘alaba qozondi. Uchrashuvdagi har ikki golga ham Oston O‘runov mualliflik qildi. Shu tariqa, O‘zbekiston terma jamoasi “Al Ain Cup” musobaqasi final bosqichiga yo‘l oldi. Jamoa hal qiluvchi bahsda Eronga qarshi o‘ynaydi. 3-o‘rin uchun o‘yinda esa Misr hamda Kabo-Verde kuch sinashadi.
