Ispaniya La Ligasi 10-turidan o‘rin olgan “Real Madrid” hamda “Barselona” jamoalari o‘rtasidagi o‘yin vaqtida “qirollik klubi” muxlisi yurak xurujiga uchrab vafot etdi. Bu haqda Sport nashri xabar berdi.
Manbaga kora, voqea uchrashuvning 52-daqiqasida, aniqrog‘i fransiyalik futbolchi Kilian Mbappe hakam tomonidan belgilangan penaltini tepish paytida yuz bergan. Hujumchi zarbani golga aylantira olmagach, tribunada o‘tirgan Isroil fuqarosi hushidan ketgan.
Guvohlarning so‘zlariga ko‘ra, uning yonida o‘tirgan muxlislar va “Real” darvozaboni Tibo Kurtua hakamga o‘yinni to‘xtatish kerakligini bildirgan, ammo o‘yin davom ettirilgan.
Tibbiyot xodimlari darhol yordam ko‘rsatgan, so‘ngra muxlis shifoxonaga olib ketilgan. Afsuski, uning hayotini saqlab qolishning imkoni bo‘lmagan.
Eslatib o‘tamiz, 26-oktyabr kuni bo‘lib o‘tgan “El-Klasiko”da “Real” “Barselona” ustidan 2:1 hisobida g‘alaba qozongan edi. O‘yindagi gollarga Kilian Mbappe, Jud Bellingem hamda Fermin Lopes mualliflik qildi. Hozirda “qirollik klubi” 27 ochko bilan turnir jadvalining birinchi pog‘onasidan joy olgan. 22 ochkosi bor “Barselona” esa 2-o‘rinni egallab turibdi.
