Ijtimoiy tarmoqlarda Toshkent viloyati Parkent tumanida Cobalt 9 yoshli bolani bosib, sudrab ketgani aks etgan videolar tarqaldi. Viloyat YHXB holat yuzasidan ma’lumot berdi.
Hodisa 18-oktyabr kuni soat taxminan 11:00 larda Toshkent viloyati Parkent tumani hududidan o‘tgan (D-015 Qizilto‘g‘ – Parkent – Yangi bozor) avtomobil yo‘lining 57-kilometrida sodir bo‘lgan.
Hodisada 1986-yilda tug‘ilgan X.D. boshqaruvidagi Cobalt piyodalar o‘tish joyidan yugurib o‘tayotgan 2016-yilda tug‘ilgan Sh.M.ni urib yuborgan. Natijada piyada tan jarohatlari olib, tuman markaziy shifoxonasiga yotqizilgan. Hozirda uning ahvoli yaxshi, davolanish jarayonida.
Ba’zi ijtimoiy tarmoqlarda bola halok bo‘lgani haqida tarqatilayotgan ma’lumotlar haqiqatga to‘g‘ri kelmaydi va asossiz hisoblanadi.
Ushbu YTHda ishtirokchi sifatida Damas haydovchisi, 1992-yilda tug‘ilgan K.X. ham qayd etilgan.
Mazkur holat yuzasidan Parkent tumani IIB mas’ul xodimlari tomonidan tergovga qadar tekshiruv harakatlari olib borilmoqda.
