O‘zbekiston terma jamoasi va “Manchester Siti” himoyachisi Abduqodir Husanov Angliya Premyer Ligasi 4-turidan o‘rin olgan “Manchester Yunayted”ga qarshi bahsni asosiy tarkibda boshladi va 90 daqiqa davomida maydonda harakat qildi.
Uchrashuvdan so‘ng Sofascore portali Husanovning o‘yinini 7,4 ball bilan baholadi. Bu ko‘rsatkich “shaharliklar” himoya chizig‘ida harakat qilgan futbolchilar orasida eng yaxshi natija bo‘ldi. Umuman olganda, bu butun jamoa tarkibidagi eng yaxshi to‘rtinchi natija hisoblanadi. Faqatgina Erling Holand, Jeremi Doku va Fil Foden undan yuqori o‘rinlarda qayd etgan.
Abduqodir o‘yin davomida 70 marta to‘pga tegindi. U 41 marta jamoadoshlariga uzatma berdi va ularning 32 tasi aniq manzilga yetib bordi (78 foiz aniqlik). Yerda 6 marta to‘p uchun kurash olib borib, ulardan 3 tasida ustun keldi. Shuningdek, havoda 4 marta kurash olib borib, 2 tasida raqibidan kuchliroq ekanligini isbotladi. Husanov 90 daqiqa ichida 6 marta to‘pni o‘z jarima maydonchasidan uzoqlashtirdi va 4 marta raqib hujumining xavfli tus olishini oldini oldi.
Norvegiyalik hujumchi Erling Holand o‘yinning eng yaxshi futbolchisi deb topildi. U 87 daqiqa harakat qilib, ikkita gol urdi va 9,4 ball bilan baholandi. Ikki golga hammualliflik qilgan Jeremi Doku 8,4 ball bilan ikkinchi o‘rinni egalladi. “Manchester Siti”ning birinchi goliga mualliflik qilgan Fil Foden esa 7,6 ball bilan uchinchi pog‘onada qayd etildi.
Asosiy tarkibda maydonga tushgan futbolchilar orasida eng past ko‘rsatkich Yoshko Gvardiolga tegishli bo‘ldi — xorvatiyalik himoyachi 90 daqiqa o‘ynab, 6,8 ball bilan baholandi.
