Angliya Premyer Ligasi 21-turidan o‘rin olgan “Manchester Siti” hamda “Brayton” o‘rtasidagi bahs yakunlandi. Manchesterdagi “Etihad” stadionida o‘tgan o‘yinda durang natija qayd etildi.
Uchrashuvdagi hisob 41-daqiqada Erling Holand tomonidan ochildi. U belgilangan penaltini aniq amalga oshirib jamoasini hisobda oldinga olib chiqdi. 60-daqiqada esa Kaoru Mitoma gol kiritib, uchrashuvda muvozanatni tikladi. Mazkur hisob o‘yin yakuniga qadar o‘zgarmadi.
O‘zbekiston terma jamoasi himoyachisi Abduqodir Husanov bahsni asosiy tarkibda boshladi va to‘liq harakat qildi.
Ushbu natijadan so‘ng Pep Gvardiola jamoasi ochkolari sonini 43 taga yetkazgan holda APL turnir jadvalida 2-o‘rinda qoldi. Shaharliklar bilan bir xil ochkoga ega “Aston Villa” ham mazkur tur doirasida durang natija qayd etdi.
Peshqadam “Arsenal” 48 ochkoga ega. Londonliklar o‘z uchrashuvini 9-yanvarga o‘tar kechasi “Liverpul”ga qarshi o‘tkazadi. “Brayton” 21-turdan so‘ng 29 ochko bilan 9-o‘ringa joylashdi.
“Manchester Siti” navbatdagi uchrashuvini 10-yanvar kuni Angliya kubogi 1/32 final bosqichi doirasida “Ekseter Siti”ga qarshi o‘tkazadi. APL doirasidagi bahs esa 14-yanvar kuni “Nyukasl”ga qarshi kechadi.
Angliya Premyer Ligasi
21-tur
“Manchester Siti” — “Brayton” 1:1
Gollar: 1:0 — Holand (41, pen), 1:1 — Mitoma (60)
