Portugaliyalik mashhur hujumchi Krishtianu Ronaldu yangi mavsumda ham Saudiya Arabistonining “An-Nassr” klubi sharafini himoya qiladi. Bu haqda insayder Fabrisio Romano o‘zining ijtimoiy tarmoqdagi sahifasi orqali xabar berdi.
Manbaga ko‘ra, 40 yoshli hujumchi “An-Nassr” bilan yangi bitim imzolashga yaqin turibdi. Hozirda rasmiy hujjatlar tekshirilmoqda hamda shartnomaning yakuniy tafsilotlari muhokama qilinmoqda. Yangi kelishuv bir yoki ikki yillik bo‘lishi kutilmoqda. Ronaldu istasa, 2027-yil iyuniga qadar klub safida to‘p surishni davom ettirishi mumkin bo‘ladi.
Ma’lumot uchun, o‘tgan mavsumda “An-Nassr” hech qanday sovringa ega chiqa olmadi. Saudiya Arabistoni Pro Ligasida jamoa 70 ochko jamg‘arib, uchinchi o‘rinni egalladi. Ronaldu esa barcha musobaqalarda 35 ta gol va 4 ta golli uzatma bilan mavsumni yakunladi.
Eslatib o‘tamiz, 2025-yil 25-iyun kuni “An-Nassr” italiyalik murabbiy Stefano Piolining iste’foga chiqqanini rasman e’lon qildi.
