Ispaniya chempionatining 35-turida asosiy e’tibor “Barselona” va “Real Madrid” o‘rtasidagi “El-Klasiko” bahsiga qaratildi. Kilian Mbappe het-trik qayd etib, 21-asrda kataloniyaliklar darvozasini 3 marta ishg‘ol qilgan ilk madridlik futbolchiga aylandi.
Avvalgi shunga o‘xshash holat 1995-yil yanvar oyida Ivan Samorano tomonidan qayd etilgan edi. O‘shanda chililik hujumchi “Barselona” darvozasiga uch bor yo‘l topa olgan hamda o‘yin “Real” foydasiga 5:0 hisobida yakunlangan. O‘sha mavsumda Madrid klubi “Barselona”ning to‘rt yillik chempionlik seriyasiga barham berib, La Liga g‘olibiga aylangandi.
Ta’kidlash kerakki, 21-asrda “Barselona” bilan “El-Klasiko”da het-trik qayd etgan yulduzlar bor – Lionel Messi bunday natijani ikki marta amalga oshirgan bo‘lsa, Luis Suares bir marta “Real” darvozasini uch marta ishg‘ol qilgan.
Ma’lumot uchun, “Barselona” — “Real” uchrashuvda maydon egalari 4:3 hisobida g‘alaba qozondi. Mbappe uchta to‘p kiritgan bo‘lsa, Rafinya dubl qayd etdi. Yamal hamda Garsiya bittadan gol muallifiga aylandi.
35-turdan so‘ng “Barselona” La Liga turnir jadvalida birinchi o‘rinni egallab turibdi (82 ochko), “Real Madrid” esa ikkinchi pog‘onada joylashgan (75 ochko).
