32 yoshli kongolik hujumchi Tjevi Bifuma 2024-yilning yozida Gretsiya chempionatini tark etib, Eronning “Istiqlol” klubiga o‘tishga qaror qildi. Yaqinda u juda qiziq intervyu berdi.
Bifuma Eron klubi taklifini qabul qilishdan avval internet orqali jamoa haqida ma’lumot izladi va uning Osiyo Chempionlar Ligasi doirasida “An-Nassr”ga qarshi o‘ynashi haqida ma’lumot oldi. Ushbu bahsda Krishtianu Ronaldu ham maydonga tushishi kutilayotgan edi.
Ronalduga qarshi o‘ynash — mening bir umrlik orzum edi. Shuning uchun ko‘p o‘ylab o‘tirmay, taklifni qabul qildim, deydi futbolchi.
Ammo Bifuma bir muhim narsani e’tibordan chetda qoldirdi — Eron futbolida ikkita “Istiqlol” bor edi: “Istiqlol Tehron” va “Istiqlol Xuziston”.
Kongolik hujumchi yanglishib “Istiqlol Tehron” o‘rniga “Istiqlol Xuziston” bilan shartnoma imzolaganini keyinroq tushundi. Natijada u Ronalduga qarshi o‘ynash imkoniyatidan mahrum bo‘ldi.
23-turdan keyin “Istiqlol Xuziston” Eron chempionatida 25 ochko to‘lab, turnir jadvalining 12-pog‘onasini egallab turibdi. Futbolchi joriy mavsum Pro Ligasi doirasidagi 20 uchrashuvda maydonga tushib, 4 ta gol va 3 ta assist muallifiga aylangan.
Ma’lumot uchun, Bifuma Ispaniyaning “Espanyol”, “Las-Palmas”, “Granada” kabi jamoalarida o‘ynagan. 2014-yilda “Vest Bromvich” safida Angliyada qisqa muddat harakat qildi va keyin professional faoliyatining katta qismini Turkiyada o‘tkazdi.
