Toshkent metrosi uchun 2024-yil 31-dekabr kuni 3 ta yangi harakat tarkibi — 12 ta metro vagoni olib kelindi. Bu haqda metropoliten matbuot xizmati xabar berdi.
Ma’lum qilinishicha, ushbu harakat tarkiblari belgilan yo‘riqnomaga asosan, 9-10 kun davomida texnik sinovdan o‘tkazilib, so‘ngra yo‘lovchilarga xizmat qilishi yo‘lga qo‘yiladi.
Transport vazirligi bergan ma’lumotga ko‘ra, 2017-yildan 2019-yilgacha 36 ta poyezd ekspluatatsiya qilingan. 2024-yilga kelib ularning soni 65 taga yetkazildi. 2025-yil yakuniga qadar yana 26 ta zamonaviy tarkib xarid qilinishi rejalashtirilgan.
So‘nggi vaqtlarda metro xizmatiga bo‘lgan talab kun sayin ortib bormoqda. Toshkent metropoliteni 16-dekabr kuni birinchi marta bir kunda 1 million yo‘lovchiga xizmat ko‘rsatdi. Millioninchi yo‘lovchiga jamoat transportidan bir yil davomida bepul foydalanish imkonini beruvchi transport kartasi sovg‘a qilindi.
2025-yil 1-yanvardan metropolitenda bir yo‘lovchi qatnovi uchun cheklangan tarif – 3 000 so‘m etib belgilandi. Bunda to‘lov elektron to‘lov tizimi (transport yoki bank kartasi) orqali amalga oshirilganda hozirgidek o‘zgarishsiz qoladi — 1 700 so‘m.
Bugungi kunda metropoliten liniyalarining umumiy uzunligi 71 kilometrga, bekatlar soni esa 50 taga yetkazildi.
