19-dekabr kuni Twitter egasi va bosh direktori Ilon Mask o‘z sahifasiga ijtimoiy tarmoq rahbari lavozimidan ketishi kerak yoki yo‘qligi haqida so‘rovnoma joylashtirgan edi. Foydalanuvchilarning ko‘pchiligi Maskning ketishini yoqlab ovoz berdi, shu munosabat bilan u munosib davomchi topganidan keyin o‘z lavozimini tark etishga va’da berdi.
“Bosh direktor lavozimiga bu ishni o‘z zimmasiga olish uchun yetarlicha kaltafahm bo‘lgan odamni topishim bilan, bosh direktor lavozimidan ketaman! Shundan keyin ishlab chiquvchilar va serverlarga xizmat ko‘rsatish bo‘yicha mutaxassis jamoasiga rahbarlik qilaman, xolos”, — deb yozdi Ilon Mask o‘z sahifasida.
CNBC telekanali Mask bu so‘rovnomani e’lon qilishidan avvalroq Twitter uchun yangi rahbar qidirishni boshlaganini ma’lum qildi. Biznesmen ijtimoiy tarmoqqa shu yilning 28-oktabridan buyon rahbarlik qilmoqda: bu vaqt ichida u Twitter’da bir qator islohotlar o‘tkazdi, ular platforma auditoriyasi, jamoat arboblari va siyosatchilar orasida turli munosabatlarga sabab bo‘ldi.
Ilon Mask Twitter’ni 44 milliard dollarga sotib oldi. O‘shandan buyon u ko‘plab shov-shuvli qarorlarni qabul qilmoqda. Chunonchi, u ko‘k verifikatsiya belgisini pulli qilib qo‘ydi, xodimlarning yarmini ishdan bo‘shatdi, Donald Trampning akkauntini blokdan chiqardi va, go‘yoki, josuslik bilan shug‘ullangan jurnalistlar akkauntlarini bloklab qo‘ydi.
Izoh (0)