Germaniyaliklarning 70 foizdan ortig‘i Merkelning kansler lavozimiga qaytishini qo‘llab-quvvatlamadi

Angela Merkel Germaniya kansleri lavozimini tark etganidan bir yil o‘tib, Funke Media Group buyurtmasi bilan Civey instituti tomonidan o‘tkazilgan so‘rovda qatnashgan germaniyaliklarning 71 foizi uning hokimiyatga qaytishiga qarshi chiqdi. Bu haqda  Die Zeit xabar bermoqda.

Merkelning lavozimga qaytishini respondentlarning 23 foizi qo‘llab-quvvatlagan.

“Angela Merkel kansler sifatida Germaniyaning amaldagi kansleri Olaf Sholsdan yaxshiroqmidi?” degan savolga javoban 43 foiz ishtirokchi Merkelni Sholsdan yaxshiroq kansler deb atadi. 41 foiz  esa teskari fikr bildirdi.

Ma’lumot uchun so‘rovnoma 24-noyabr kuni onlayn tarzda o‘tkazilgan. Unda 18 yoshdan oshgan 5000 dan ortiq Germaniya fuqarolari ishtirok etgan.

Germaniya prezidenti Frank-Valter Shtaynmayer 2021-yilning oktabr oyida kansler Angela Merkel va uning kabinetini rasman iste’foga yuborgan edi. Bungacha mamlakatda o‘tkazilgan saylovlarda Merkel uzoq yillar davomida yetakchilik qilgan Xristian Demokratik Ittifoqi partiyasi 24,1 foiz ovoz to‘plab, tarixdagi eng yomon natijani ko‘rsatgan. Saylovda birinchi o‘rinni 25,7 foiz ovoz bilan Shols boshchiligidagi sotsial-demokratlar oldi. Shols Merkel davrida vitse-kansler edi.

Shols dekabr oyida Merkelning o‘rnini egalladi. Merkel 2005-yildan beri 16 yil davomida kansler lavozimida ishlagan. So‘nggi saylovlar oldidan u siyosatdan ketish niyatini ma’lum qilgandi.