Saratonning eng xavfli turini erta aniqlash usuli topildi

Buyuk Britaniya olimlari saraton kasalligining eng xavfli turini erta aniqlash usulini topdi. Izlanishlarda oshqozon osti bezi saratoniga chalingan 9 ming nafarga yaqin kishining tibbiy ma’lumotlari (turli davrlardagi tana vazni indeksi, qondagi qand miqdori) 35 ming nafar sog‘lom insonlar ko‘rsatkichlari bilan solishtirilgan.

Ta’kidlanishicha, oshqozon osti bezi saratoni o‘sma kasalliklari orasida eng xavflisi hisoblanadi. Chunki u sezilarli alomatlarsiz paydo bo‘ladi. Vazn kamayishi va qon tarkibida qand miqdori oshishi bu dardga xos belgilardir. Ammo organizmdagi ushbu o‘zgarishlar qachon va qanday sodir bo‘lishi noma’lum. Agar shifokorlar bu borada aniq ma’lumotga ega bo‘lsa, kasallikni erta tashxislash imkoniyati oshishi, shubhasiz.

Mazkur ehtiyoj Buyuk Britaniya olimlari izlanishlari uchun sabab bo‘ldi. Ular yuqoridagi alomatlar bemorlarda qachon rivojlanishini o‘rgandi. Yakunda ushbu xavfli dardga yo‘liqqan odamlarda keskin vazn yo‘qotish holati kasallik tashxisi qo‘yilishidan ikki yil avval boshlangani ma’lum bo‘ldi. Ya’ni ularda tana vazn indeksi sog‘lom kishilarga nisbatan deyarli uch birlik pastligi qayd etildi. Shuningdek, oshqozon osti bezi saratoniga chalinganlar qonida qand miqdori ortishi xastalik aniqlanishidan uch yil oldin boshlangani kuzatildi.

Olimlarning yakuniy xulosasiga ko‘ra, qandli diabetdan aziyat chekayotgan bemorlarda ushbu o‘sma kasalligi rivojlanish xavfi yuqori bo‘ladi.