Respublika kardiologiya markazida noyob va murakkab operatsiyalar turi 34 taga yetkazildi
Sog‘liqni saqlash vazirligi matbuot xizmatining xabar qilishicha, Respublika kardiologiya markazida noyob va murakkab operatsiyalar turi 34 taga yetkazildi.
JSST ma’lumotlariga ko‘ra, dunyoda yuz berayotgan o‘lim holatlarining qariyb 60 foizi yurak-qon tomir tizimi kasalliklari oqibatida kelib chiqmoqda. Qolaversa, bu turdagi xastaliklar hanuz nogironlikka yetaklovchi eng asosiy sabablardan biri. Bu darddan aziyat chekkan o‘zbekistonliklar yaqin yillargacha Germaniya, Turkiya, Rossiya, Hindiston, Janubiy Koreya kabi mamlakatlarga davolanish uchun borgan bo‘lsa, endi bu yo‘nalishdagi barcha ilg‘or muolaja usullari O‘zbekistonda yo‘lga qo‘yilgan.
Xususan, Respublika ixtisoslashtirilgan kardiologiya ilmiy-amaliy tibbiyot markazida hozir 34 turdagi murakkab va noyob operatsiyalar o‘tkazilmoqda.
Stentlash, aorta koronar shuntlash, radiochastotali ablatsiya, elektrokardiostimulyator o‘rnatish, yurak klapanlarini protezlash kabi ochiq usuldagi amaliyotlar yiliga minglab bemorlarning hayotini saqlab qolish va umrini uzaytirish imkonini bermoqda. Bundan tashqari, yurak nuqsonlarini endovaskulyar usulda davolash ham keng ommalashyapti. Muassasamizning Rentgenendovaskulyar jarrohlik bo‘limi shu yo‘nalishga ixtisoslashgan, — deydi markaz direktori Xurshid Fozilov.
Surunkali toj tomirlar okklyuziyasini antegrad va retrograd yo‘llar bilan ochish va stentlash, kateter orqali aortal klapan implantatsiyasi, qorinchalararo va bo‘lmachalararo to‘siq defekti hamda yurak tug‘ma nuqsonlarini kateter orqali okklyuder bilan yopish amaliyotlari shular jumlasidan. Ushbu innovatsion muolaja turlarining noyobligi shundaki, ular ko‘krak qafasini kesmasdan, bilak tomiri orqali bajariladi.
Elektrofiziologik tekshiruvlar va yurak aritmiyalari murakkab turlarini jarrohlik yo‘li bilan davolash bo‘limida esa 10 turdagi operatsiyalar o‘tkazilmoqda. Ulardan 6 tasida radioto‘lqinli ablatsiya usuli qo‘llansa, 4 tasida turli elektrokardiostimulyatorlar implantatsiya qilinadi.
Jumladan, radiochastotali ablatsiya usuliga muvofiq, ko‘krak qafasini ochmasdan, maxsus moslamalar yordamida yurakka yetib borgan holda uning notekis urishi (aritmiya) bilan bog‘liq ba’zi nuqsonlar radioto‘lqin vositasida bartaraf etiladi.
Kardiojarrohlik bo‘limida ochiq usuldagi yuqori texnologik amaliyotlar o‘tkaziladi. Ushbu muolaja turi ishlab turgan yurakda bajarilib, bir vaqtning o‘zida ushbu tana a’zosida ikki va undan ortiq o‘ta murakkab operatsiyalar amalga oshiriladi. Ya’ni yurak klapanlarini protezlash, plastika qilish, tug‘ma nuqsonlarni jarrohlik yo‘li bilan bartaraf etish, yurak mushaklari o‘smalari, qorincha va bo‘lmachalar ichidagi tromblarni olib tashlash sun’iy qon aylanish tizimi yordamida o‘tkaziladi.
E’tiborlisi, markazning hududiy filiallariga ham angiograf uskunasi o‘rnatilib, koronarografiya va stentlash amaliyotlari yo‘lga qo‘yilgach, davolash hamda diagnostika usullari 40 tagacha yetkazildi.
