Qozog‘iston parlamenti deputati rossiyalik siyosatchini qozoqofobiyada aybladi

Qozog‘iston parlamenti quyi palatasi deputati Oygul Kuspan “Qozog‘istonning sirpanchiq yo‘li” haqida gapirgan Rossiya Davlat dumasining MDH ishlari bo‘yicha qo‘mitasi raisining birinchi o‘rinbosari Konstantin Zatulinning tahdidlariga izoh berdi.

Zatulin Qozog‘iston AQSH va Yevropa Ittifoqining ikkilamchi sanksiyalaridan qo‘rqib, MIR kartalarini qabul qilishdan bosh tortgani, Rossiya yuk mashinalarini chegarada ushlab turishni va hokazo taqiqlarni boshlagani, bularning barchasini do‘stona pozitsiya deb bo‘lmasligini aytgan edi. “MK” nashriga bergan intervyusida u Rossiya bunga albatta munosabat bildirishidan ogohlantirgan va Qozog‘iston Xitoyning yordamiga behuda umid qilayotganini ta’kidlagan. Zatulinning so‘zlariga ko‘ra, Xitoy Rossiya tomonida va Rossiyaga dushman harakatlarni qo‘llab-quvvatlamaydi.

Oygul Kuspan o‘zining Facebook’dagi sahifasida Zatulin kabi odamlar tufayli “yaqin xorijdagi do‘st Rossiya qiyofasi tajovuzkorlik, takabburlik va jaholat so‘zlari bilan yonma-yon ta’riflanadi”, deb yozgan.

Qisman safarbarlik e’lon qilingandan keyingi birinchi kunda Qozog‘istonga 10 mingga yaqin rossiyalik keldi. Na hokimiyat, na xalq ularga hech qanday to‘siq qo‘ymayapti. Bu bizning mamlakatimizda rusofobiya yo‘qligidan dalolat beradi. Deputat Zatulin, negadir, buni sezmayapti, aksincha mamlakatimiz hukumatini Rossiyaga sadoqat ko‘rsatish, lekin Qozog‘iston xalqi manfaatlariga jiddiy zarar yetkazish uchun Qozog‘iston iqtisodiyotini G‘arbning ikkilamchi sanksiyalari ostida qoldirishga chaqirmoqda. Yodimda, joriy yilning iyun oyida deputat Zatulin Qozog‘istonga diqqat qaratishga chaqirib, Ukraina misolida bo‘lgani kabi hamma narsa bo‘lishi mumkinligiga ishora qilgandi, — deya qo‘shimcha qildi deputat.