Finlyandiya Orol fojiasi oqibatlarini yumshatish bo‘yicha O‘zbekistonga yordam ko‘rsatishda davom etadi

O‘zbekiston tashqi ishlar vaziri Vladimir Norov BMT Bosh assambleyasining 77-sessiyasida ishtirok etish doirasida Finlyandiya tashqi ishlar vaziri Pekka Xaavisto bilan uchrashuv o‘tkazdi.

TIV ma’lumotiga ko‘ra, tomonlar siyosiy muloqotni chuqurlashtirish, savdo-iqtisodiy va madaniy-gumanitar aloqalarni jadallashtirish bo‘yicha amaliy choralar ko‘rishga tayyor ekanini bildirdi. Innovatsiyalar, ta’lim, oziq-ovqat va farmatsevtika sanoati, AKT, qishloq xo‘jaligi va turizm sohalarida qo‘shma investitsiya loyihalarini amalga oshirish muhimligi qayd etildi.

Vladimir Norov O‘zbekiston Finlyandiya kompaniyalarining ilg‘or texnologiyalarini milliy iqtisodiyotga jalb etishdan manfaatdorligini bildirdi.

Muzokaralarda atrof-muhitni muhofaza qilish masalalariga ham alohida e’tibor qaratildi. Pekka Xaavisto qayd etganidek, Finlyandiya Orol dengizining qurishi oqibatlarini yumshatish, mintaqadagi ekologik vaziyatni yaxshilashda BMTning Orolbo‘yi mintaqasi uchun inson xavfsizligi bo‘yicha ko‘p sheriklik jamg‘armasi orqali O‘zbekistonga faol yordam ko‘rsatishda davom etishga tayyor.

Ta’lim va madaniyat sohalaridagi aloqalar ijobiy sur’atlarda o‘sayotgani qayd etildi. Sentabr oyida Toshkent shahrida Nordik xalqaro universitetining ochilishi O‘zbekistonda Finlyandiya ta’lim tizimini o‘rganish va joriy etishga, kadrlar tayyorlashga yordam berishga xizmat qilishi e’tirof etildi.

Mavzuga doir: Orol dengizining bugungi kundagi holati aks etgan surat e’lon qilindi