Toshkent viloyatida noqonuniy yer sotish holati aniqlandi, deb xabar bermoqda IIV JQBB Korrupsiya va iqtisodiy jinoyatlarga qarshi kurashish boshqarmasi.
Ma’lum qilinishicha, 29-avgust kuni IIVga ayol fuqaro ariza bilan murojaat qilib, ikki nafar shaxslarga nisbatan qonuniy chora ko‘rishni so‘ragan. Arizada aytilishicha, ayol yer olish maqsadida “OLX.uz” sayti orqali notanish makler bilan tanishib qolgan. So‘ng ushbu makler Sirdaryo viloyati, Sirdaryo tumanidagi “Bek gravy” MCHJ rahbarining o‘g‘li bilan tanishtirgan.
U jamiyatga ajratilgan 4,5 gektar bo‘sh yer maydonini 240 ming dollarga sotishini va kadastrda ishlovchi tanishi orqali yer maydoniga hech qanday qurilma qurmasdan kadastr hujjatlarini rasmiylashtirib berishini aytgan, Evaziga ayoldan 1 000 dollar va yer maydoni uchun bo‘nak sifatida 12 ming dollar talab qilgan.
Mazkur arizaga asosan shu kuni IIV JQB K va IJQKB, Yer resurslarini talon-taroj qilinishiga qarshi kurashish bo‘limi, Bosh prokuratura hamda Iqtisodiy jinoyatlarga qarshi kurashish Departamentining Zangiota tuman bo‘limi xodimlari bilan hamkorligida tezkor tadbir o‘tkazilgan.
O‘tkazilgan tezkor tadbir davomida Toshkent viloyati, Zangiota tumani, “MAN” avtosaloni avtoturargohida gumonlanuvchi makler ariza muallifidan talab qilgan pullardan 13 ming dollarni avans sifatida olgan vaqtida ashyoviy dalillar bilan ushlangan.
Holat yuzasidan 30-avgust kuni IJQK departamentining Zangiota tumani bo‘limi tomonidan gumonlanuvchi va boshqalarga nisbatan Jinoyat kodeksining tegishli moddalari bilan jinoyat ishi qo‘zg‘atilib, fuqarolar ushlangan.
Olib borilgan tergovoldi tekshiruv ishlari davomida gumonlanuvchi kadastr hujjatlarini kim orqali rasmiylashtirib bermoqchi bo‘lgani aniqlanib, hozirda ushbu shaxsning jinoyatga aloqadorligi tekshirilmoqda.
Izoh (0)