O‘zbekiston va Janubiy Koreya jinoyat sodir etishda gumon qilinayotgan o‘zbekistonliklar to‘g‘risida ma’lumot almashadi
O‘zbekistonning Janubiy Koreya poytaxti Seuldagi elchixonasi xodimlari Changvon shahri politsiya departamentining Xalqaro hamkorlik bo‘limi mas’ul xodimi Song Pyong Jin bilan uchrashdi, deb xabar bermoqda “Dunyo” agentligi.
Qayd etilishicha, suhbat chog‘ida xalqaro jinoyatchilikka qarshi kurashish sohasida ikki mamlakat huquq-tartibot idoralari o‘rtasidagi hamkorlikning izchil rivojlanishining ijobiy dinamikasi qayd etilgan. Qisqa vaqt ichida terrorizmga qarshi kurashish bo‘yicha mutaxassislar o‘rtasida to‘g‘ridan-to‘g‘ri hamkorlik aloqalari yo‘lga qo‘yilgani, tashriflar almashinuvi amalga oshirilgani, ular davomida ikki mamlakat mutaxassislari o‘zaro tajriba va manfaatli axborot almashish imkoniga ega bo‘lgani ta’kidlangan.
Changvon shahrida O‘zbekiston fuqarolarining ko‘pligi hisobga olinib, muayyan jinoyatni sodir etishda gumon qilinayotgan o‘zbekistonliklar to‘g‘risida o‘z vaqtida ma’lumot almashish uchun mazkur departament xodimlari bilan bevosita aloqalarni yo‘lga qo‘yish taklif etilgan.
O‘z navbatida, Song Pyong Jin O‘zbekiston fuqarolari tomonidan sodir etilayotgan jinoyatlarni profilaktika qilishda elchixona bilan yaqin hamkorlikni tashkil etishga tayyorligini ta’kidlagan. Politsiya vakilining so‘zlariga ko‘ra, shaharda 2 mingga yaqin O‘zbekiston fuqarosi yashaydi. Shu munosabat bilan Song Pyong Jin Changvon shahar politsiya departamenti O‘zbekiston fuqarolarining ushbu davlatda biror noqulayliklarsiz yashashi uchun barcha imkoniyatlarni ishga solishini ta’kidlagan.
