Buxoroda aliment qarzdorligi 109 mln so‘mga yetgan ota 15 sutkaga qamaldi

Buxoroda 10 yildan beri aliment to‘lashdan bo‘yin tovlab kelgan ota 15 sutkaga qamaldi. Bu haqda “Daryo”ga MIB viloyat boshqarmasi axborot xizmati rahbari Ilhom Tursunov xabar berdi.

Ma’lum bo‘lishicha, fuqarolik ishlari bo‘yicha Kogon tumanlararo sudining 2010-yil 1-iyundagi buyrug‘iga asosan viloyatning Kogon tumanida yashagan L.K. turmush o‘rtog‘i N.Sh.ga bir nafar voyaga yetmagan farzandi uchun aliment to‘lashi lozimligi belgilangan. Ammo qarzdor ota aliment to‘lashdan bo‘yin tovlab kelgan.

“Qarzdor ota bu borada ikki marotaba sudlangan bo‘lishiga qaramay, tegishli xulosa chiqarmagan. 10 yildan ortiq muddat davomida aliment to‘lamagani bois uning qarzdorligi 108 million 900 ming so‘mga yetgan. Xotini N.Sh. esa bu haqda shikoyat qilgan. Byuro organlarining qidiruv bo‘limi vakillari tomonidan fuqaro L.K. qidiruvga berilib, Toshkent shahridan topilgan.

Fuqaro topilgach, yillar davomida hech qanday foydali mehnat bilan shug‘ullanmagani, hech qanday mol-mulkka ega emasligi, aliment to‘lovini amalga oshirishga layoqati ham yo‘qligi, achinarlisi, ota poytaxtning turli ko‘cha va guzarlaridagi bekat va axlatxonalarda yashab yurgani aniqlandi”, — deydi MIB viloyat boshqarmasi axborot xizmati rahbari.

Jinoyat ishlari bo‘yicha Kogon shahar sudining navbatdagi ochiq sud majlisida aliment to‘lashdan bo‘yin tovlab kelgan ota videokonferensaloqa rejimida jinoyat ishlari bo‘yicha Toshkent shahar Uchtepa tuman sudi binosidan qatnashgan. Sud qarzdor otaga Ma’muriy javobgarlik to‘g‘risidagi kodeksining tegishli moddasi bilan 15 sutka ma’muriy qamoq jazosi tayinlagan. Qarzdor ota ma’muriy qamoq jazosini o‘tish uchun Toshkent shahridagi maxsus qabul qilish muassasasiga joylashtirilgan.