30-noyabr kuni o‘tkazilgan “O‘zbekiston biznes hamjamiyatida halollik” biznes forumida mamlakatdagi biznes vakillari faoliyati uchun yaratib berilayotgan keng imkoniyatlar yuzasidan o‘zaro muloqot qilindi, deb xabar beradi Korrupsiyaga qarshi kurashish agentligi.

Foto: Korrupsiyaga qarshi kurashish agentligi

Ma’lum qilinishicha, biznes va tadbirkorlik sohasidagi yangi muhim hujjat — “O‘zbekiston biznesining korrupsiyaga qarshi kurashish xartiyasi” forumning asosiy mavzusi bo‘lgan.

Mazkur Xartiya BMTning Korrupsiyaga qarshi konvensiyasi talablari asosida Korrupsiyaga qarshi kurashish milliy kengashi tomonidan tasdiqlangan korrupsiyaga qarshi xalqaro standartlarni milliy qonunchilikka implementatsiya qilishni davom ettirish bo‘yicha “yo‘l xaritasi”ning ijrosi yuzasidan ishlab chiqilgan. Xartiya Korrupsiyaga qarshi kurashish agentligi, Savdo-sanoat palatasi va Tadbirkorlik subyektlarining huquqlari va qonuniy manfaatlarini himoya qilish bo‘yicha vakil tomonidan tasdiqlangan.

Hujjat 43 ta vazirlik va idoralar, huquqni muhofaza qiluvchi organlar, jamoatchilik tashkilotlari mutaxassislari ishtirokida qator muhokamalardan o‘tkazilgan. Shuningdek, xalqaro standartlar, MDH davlatlari, Fransiya, Ruminiya, Gruziya va AQSh kabi mamlakatlarning xususiy sektorda korrupsiyaga qarshi kurashish choralarni joriy etish borasidagi tajribasi o‘rganilgan.

Qayd etilishicha, hujjat tadbirkorlik subyektining moliyaviy faoliyatini boshqarish, shartnoma munosabatlari, kadrlarni tanlash va o‘qitish, ichki intizom va qonuniylikni mustahkamlash, davlat xaridlari kabi muhim yo‘nalishlarda korrupsiya xavflarining oldini olishga qaratilgan kompleks choralarni o‘z ichiga olgan.

Mutaxassislar fikricha, mazkur hujjat normalarining amaliyotga tatbiq etilishi xususiy sektorda korrupsiyaning oldini olish, mamlakatning investitsiyaviy jozibadorligini oshirish, “halol” tadbikorlarni rag‘batlantirish tizimini joriy etish imkonini beradi.

Forumda, shuningdek, “Korrupsiyaga qarshi kurashish Xartiyasi a’zoligiga qo‘shilish va yagona Reyestrni yuritish tartibi to‘g‘risida”gi nizom xususida ham batafsil ma’lumot berilgan.

Foto: Korrupsiyaga qarshi kurashish agentligi

Ushbu hujjat Korrupsiyaga qarshi kurashish agentligi, Savdo-sanoat palatasi, O‘zbekiston prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakilning qo‘shma qarori bilan tasdiqlangan. Nizomda tadbirkorlik subyektlari tomonidan Xartiyaga qo‘shilish, ma’lumotlarni elektron “yagona reyestr”da aks ettirish va reyestrdan chiqarish tartibi aniq belgilab berilgan.

Reyestrni yuritishga Savdo-sanoat palatasi mas’ul etib belgilanib, korrupsiyaga qarshi choralarni samarali joriy etgan tadbirkorlik subyektlariga sertifikat topshirish yo‘lga qo‘yilgan.

Tadbirda ishtirok etgan xalqaro ekspertlar, jumladan, Global Risk Alliance kompaniyasi direktori A.Tosh (Buyuk Britaniya), KPMG Rossiya va MDH Xavflarni boshqarish bo‘yicha konsalting departamenti direktori I.Burdikova (Rossiya) O‘zbekistonda xususiy sektorda korrupsiyaning oldini olishga qaratilgan mazkur hujjatning qabul qilinishini ijobiy baholagan.

Forum doirasida tadbirkorlik subyektlari hamda ekspertlar tomonidan bildirilgan fikr-mulohazalar, tavsiyalar asosida xususiy sektorda korrupsiyaga qarshi kurashish tizimini yanada takomillashtirishga doir amaliy takliflar ishlab chiqilgan.

Bundan avval O‘zbekistonda korrupsionerlar “qora ro‘yxati” shakllantirilishi va ushbu ro‘yxatga tushgan shaxslar qator huquqlardan mahrum etilishi haqida xabar berilgandi.