O‘zLiDePdan prezidentlikka nomzod Shavkat Mirziyoyev Jizzax viloyati saylovchilari bilan uchrashuvda Jizzax viloyati, jizzaxliklar hamda Sharof Rashidov haqida gapirib o‘tdi, deb xabar beradi “Daryo” muxbiri.
Foto: “Daryo” / Madina Nurman
“Hayot maktabini o‘zimning Jizzaximda oldim. Jizzaxliklar meni o‘qitgan. Hech qayerda hayajon bilan so‘zga chiqqanim yo‘q. Hayajonim bor, chunki mening bozorim ham, mozorim ham shu yerda”, — deydi davlat rahbari.
Shuningdek, Mirziyoyev Sharof Rashidov haqida ham eslab o‘tgan.
“Sharof Rashidov 25 yil tizimga sadoqat bilan ishladi. Tizim 1 yilda hamyurtimizga xiyonat qildi. Bunday inson tarixda bir marta keladi. Hozir Toshkentda yursangiz, metrolar, bir qator joylar ushbu inson nomi bilan ataladi”, — deydi u. “Bundan keyin kimga yoqadi, kimga yoqmaydi, qanchalik og‘ir bo‘lmasin, tariximizni haqqoniy yozamiz”.
Eslatib o‘tamiz, Shavkat Mirziyoyev tashabbusi bilan 2017-yilda atoqli davlat va jamoat arbobi Sharof Rashidov tavalludining 100 yilligi doirasida unga bag‘ishlangan haykal ochilgan edi. Sharof Rashidov nomi bilan ataluvchi maydon va muzeyda ulkan qurilish va obodonlashtirish ishlari amalga oshirilgan.
