Fransiyaning Citroen brendi Accor va JCDecaux kompaniyalari bilan hamkorlikda shahar ichida harakatlanishi mumkin bo‘lgan haydovchisiz boshqariluvchi yangi transport konsepsiyasini taqdim etdi. Citroen Autonomous Mobility Vision nomini olgan transport vositasi asosini elektr platforma tashkil etib, unga turli tipdagi modullarni osonlik bilan o‘rnatish mumkin, deb xabar beradi “Korrespondent.net”.

Foto: Twitter / CARmagazine

Ta’kidlanishicha, Citroen Skate platformasi burilmasdan turib, turli yo‘nalishlarda harakatlanishga qodir, bunga birinchi bor 2016-yilgi Jeneva avtosalonida taqdim etilgan Goodyear Eagle 360 sferik shinalari konseptining takomillashtirilishi hisobiga erishilgan.

O‘lchami 2600x1600x510 millimetr bo‘lgan haydovchisiz boshqariladigan mashina elektromotor va beshinchi darajali avtonom boshqaruv tizimi bilan jihozlangan bo‘lib, u maxsus ajratilgan yo‘lak bo‘ylab soatiga 25 kilometr tezlikda harakatlana oladi.

Foto: Twitter / CARmagazine

Ayni vaqtida Citroen Skate modul o‘rnatish mumkin bo‘lgan uchta variantni tayyorlagan.

Birinchisi Sofitel En Voyage Pod nomini olgan bo‘lib, u mashhur Sofitel mehmonxonalar tarmog‘i sharafiga nomlangan va u chamadonlari bor ikki—uch kishining harakatlanishi uchun mo‘ljallangan. Transport hashamatli salonga, ichimlik va gazaklarga ega barga, akustik tizim, gadjetlarni simsiz quvvatlantirish imkoniyatiga ega bo‘lgan.

Foto: Twitter / CARmagazine

Ikkinchi modul Pullman Power Fitness Pod — harakat vaqtida sport bilan shug‘ullanish uchun mo‘ljallangan bir o‘rindiqli shattl: buning uchun unda “raqamli trener” va trenajyorlar mavjud bo‘lib, uning ishlashi orqali yo‘lovchi batareyalarni quvvatlantiradi.

Foto: Twitter / CARmagazine

Foto: Twitter / CARmagazine

JCDecaux City Provider nomli uchinchi modul shahar taksisining muqobili hisoblanadi. Unda besh kishi bo‘lib harakatlanish mumkin, nogironlar aravachasining tushib-chiqishi uchun qulayliklar bor. Salonida madaniy va turistik obyektlarga safarlar uyushtirishni rejalashtirish uchun bir juft interfaol ekran, USB-quvvatlantirgichlar o‘rnatilgan.

Foto: Twitter / CARmagazine

Avvalroq Citroen kompaniyasi Lada Granta narxidagi mitti elektrofurgonni taqdim etgani to‘g‘risida xabar berilgandi.