Rossiyada avtohalokatga uchragan va qiyin ahvolda qolgan ikki fuqaro Tashqi mehnat migratsiyasi agentligi tashabbusi bilan O‘zbekistonga qaytarildi. Bu haqda agentlik matbuot xizmati xabar berdi.
Foto: Tashqi mehnat migratsiyasi agentligi matbuot xizmati
Ulardan biri surxondaryolik Ch.Yu. bo‘lib, 2021-yilning may oyida Rossiyaga ishlash maqsadida borgan va avgust oyida avtohalokatga uchrab, og‘ir tan jarohati olib, mehnatga layoqatsiz bo‘lib qolgan.
U Tashqi mehnat migratsiyasi agentligi tashabbusi bilan 26-sentabr kuni Xorijda mehnat faoliyatini amalga oshiruvchi fuqarolarni qo‘llab-quvvatlash hamda ularning huquq va manfaatlarini himoya qilish jamg‘armasi mablag‘lari hisobidan Rostov-Don—Toshkent aviareysi orqali vatanga qaytarilgan.
Fuqaro agentlik xodimlari tomonidan Toshkent xalqaro aeroportida tez tibbiy yordam brigadasini jalb qilgan holda kutib olinib, Respublika shoshilinch tez tibbiy yordam ilmiy markaziga joylashtirilgan.
Yana bir fuqaro — Moskva viloyatiga ishlash uchun borgan navoiylik 58 yoshli S.Ya. muqim bir joyda ishlay olmaganligi sababli ishsiz va pulsiz qolgan. U ham homiylar hisobidan Moskva—Buxoro aviareysi orqali O‘zbekistonga olib kelingan.
Bundan avval Rossiyada salomatligi yomonlashib, qiyin ahvolda qolgan 5 nafar fuqaro O‘zbekistonga qaytarilgandi. Shuningdek, Rossiyadagi korxona ichkilikka berilgan 47 nafar o‘zbekistonlik migrant bilan mehnat shartnomasini bekor qilib, vatanga qaytarib yuborgandi.
