“Sardor” serialidagi kursant Botir Roziqov roli bilan mashhurlikka erishgan aktyor va tadbirkor Jamshid Arslonov “Daryo” internet-nashri uchun eksklyuziv intervyu berdi. Intervyuni “Daryo” muxbiri Feruz Muhammad tashkillashtirdi.

Foto: “Daryo”

Jamshid Arslonov  “Sardor” serialidan keyin suratga tushmagani, gonorarini aktyor Karim Mirhodiyevnikidan ham qimmat qilib qo‘yishiga sabab bo‘lgan ko‘ngilsizlik haqida gapirib berdi.

“Sardor” serialini suratga olish vaqtlarida endi uylangan edim. Syomka jarayonlarida ayolim homilador edi.

Bir kuni suratga olish ishlari ertalab soat 8 dan boshlandi. Suratga olish boshlanishi bilan tindirmasdan soat 13:00 gacha suratga olishdi. Oldinlari suratga olish ishlari bu qadar jiddiy bo‘lmasdi. “Kechagi ‘syomka’da nimadir yoqmaydigan ish qilib qo‘ydimmi”, deb ham o‘yladim.

Rejissor ‘syomka’ tugadi, deganida “hamma tabriklaymiz, o‘g‘illi bo‘lding”, deyishdi. Bir tomondan xursandman, bir tomondan hali vaqtli-ku, 1-iyun kuniga kutayotgandik-ku, deyman. Syomkada “tez uyingga bor”, deyishdi.

Uyga kelganimdan so‘ng bilsam, ayolimning mazasi bo‘lmasdan, qon yo‘qotishi natijasida muddatidan avval operatsiya bilan tug‘ruqni amalga oshirishgan, farzandim erta tug‘ilgan chaqaloqlar vakuumida ekan. Bolamni ko‘rdim, ayolim shoshilinch bo‘limda bo‘lgani uchun oldiga kirishga qo‘yishmadi. “Kechki payt kelsangiz, ko‘rasiz”, deyishdi.

U vaqtda 21 yosh bo‘lganman, baribir yosh bo‘lganmiz-da. Kechki payt kelganimda ayolimni ko‘ribman, ammo “bolam yaxshimi”, deb so‘ramabman. Ayolimga dori deyishdi, u deyishdi, olib kelib berdim. Ertasi kuni ertalab ‘syomka’da o‘g‘lim borligi esimga tushibdi. Keyin so‘rasam, “sen kelib, chiqib ketishing bilan o‘g‘lingning joni uzilgan”, deyishdi.

U vaqtda yoshmiz, Allohni hozirgidek tanimaganmiz. Hozirgi kunda nima bo‘lsa, yaxshilik ham, yomonlik ham Allohdan deymiz. U vaqtda esa agar uyda bo‘lganimda, ayolimni vaqtida shifoxonaga olib borganimda, balki farzandimni saqlab qolarmidim, balki bunaqa bo‘lmasmidi, balki, balki, balki…Vaholanki Allohning irodasi bilan unday bo‘lishi kerak emas, chunki birinchi farzandimga umr berilmagan.

“Sardor” serialidan keyin filmlarga ko‘p taklif bo‘ldi. Ammo ‘syomka’lardan juda ko‘nglim qolgandi. “Men Chirchiqda ‘syomka’da bo‘lmaganimda farzandim shunday bo‘lmasdi”, deb o‘ylab, kelgan takliflarga o‘sha vaqtlarda eng gonorari katta aktyor Karim Mirhodiyev bo‘lsa, men ulardan ko‘ra kattaroq pullarni aytganman. Aslida “kinoga chaqirmasin”, deb qilganman bu ishni, ammo ko‘plar “Jamshid yulduz bo‘lib ketib, yulduzlik kasaliga chalingan”ga yo‘yishdi. Lekin men xohlaganimga erishib, shundan so‘ng ancha yillar ‘syomka’larga chiqmadim.

Jamshid Arslonov, aktyor

Ma’lumot uchun, Jamshid Arslonov 1978-yil 13-may kuni Toshkent shahrida dunyoga kelgan. “Zanjir”, “Sardor”, “Chempionlik orzusi” seriallari hamda “Otamdan qolgan dalalar” filmida bosh va turli darajadagi rollarni ijro etgan. Jamshid Arslonov “Sardor” serialida kursant Botir Roziqov roli bilan mashhurlikka erishgan. “Sardor” seriali 1999—2000-yillarda suratga olingan.