Tesla rahbari Ilon Mask kompaniya xodimlari bilan o‘tkazilgan yig‘ilishda hamyonbop elektromobil — Tesla Model 3 agregatlaridagi xetchbekni taqdim etish rejalari bilan o‘rtoqlashdi, deb xabar beradi IXBT.
Istiqboldagi Tesla Model 2 (hozircha uni shunday atashmoqda) 2023-yilda taqdim etiladi. Dastlabki ma’lumotlarga ko‘ra, loyiha Tesla’ning Xitoydagi bo‘linmasiga tegishli bo‘lib, u hozirda sinovda o‘tkazilmoqda. Modelning rasmiy taqdimoti 2021-yil oxirida yoki 2022-yil boshida bo‘lib o‘tadi.
Shuningdek, Mask xodimlar bilan suhbatda Model 2 mutlaqo avtonom avtomobilga aylanishiga shama qilgan — unga rul ham, tepkilar ham kerak bo‘lmaydi. “Ushbu mashina rul va tepkilarga ega bo‘lishini istaymizmi?”, — deya savol bilan yuzlangan Mask.
Tesla rahbari 2023-yilga borib kompaniyaning avtopiloti yetarli darajada “aqlli” bo‘lishiga ishonmoqda. Ammo xususiy kompaniya rahbarining xohishi va nazorat organlarining fikri doim ham bir joydan chiqavermaydi: ular umumiy foydalanishdagi yo‘llarda rul va tepkilarsiz mashinaning chiqishiga yo‘l qo‘ymasligi mumkin.
Umuman olganda, 25 ming dollar evaziga ilg‘or avtopilot tizimiga ega elektromobilni xarid qilish taklifi jozibador hisoblanadi. Tesla’ning hozirgi avtomobillariga egalik qiluvchilar uning uchun 10 ming dollar to‘lashi kerak bo‘ladi xolos.
Avvalroq Tesla Model 3 velosipedchi bilan to‘qnashuvning oldini olish testidan o‘ta olmagani, Tesla elektrokarlari rus tilida “gapirishni” boshlagani to‘g‘risida xabar berilgandi.
Izoh (0)