Uzbekistan Airways boshqa aviakompaniyalar samolyotlari qatori Afg‘oniston hududini aylanib o‘tishni boshladi. Bunga “Novosti Tashkentskogo neba” Telegram kanali e’tibor qaratdi.
17-avgust kuni aviakompaniyaning Boeing 787-8 Dreamliner, UK-78706 samolyoti Afg‘oniston havo hududini chetlab o‘tib, Toshkent—Dehli—Toshkent yo‘nalishi bo‘yicha HY-421 / HY-422 reyslarini amalga oshirdi.
“Aftidan, parvoz davomiyligi uzaydi — odatda, bu (bir tomonlama) parvoz, taxminan, 2,5 soat davom etgan bo‘lsa, bugun uchish vaqti 3 soat 53 minutni tashkil etdi”, — deb qayd etilgan xabarda.
Uzbekistan Airways Toshkent—Dehli—Toshkent yo‘nalishi bo‘yicha parvozlarni haftada bir marotaba — seshanba kunlari amalga oshiradi. Ushbu yo‘nalish 5-martdan qayta tiklangandi. O‘shanda parvozlar haftada ikki marta — seshanba va juma kunlari amalga oshirilardi. 18-iyuldan boshlab esa Hindistonda yuzaga kelgan epidemiologik vaziyat munosabati bilan juma kunlari amalga oshiriladigan reyslar bekor qilindi.
Eslatib o‘tamiz, 15-avgust kuni “Tolibon” Afg‘onistonning butun hududini o‘z nazorati ostiga olganini e’lon qildi. 16-avgust kuni Afg‘oniston fuqaro aviatsiyasi aviakompaniyalarga mamlakat havo hududini aylanib o‘tishni tavsiya etdi.
Shu kuniyoq United Airlines, British Airways va Virgin Atlantic aviakompaniyalari Afg‘oniston havo hududidan foydalanishni to‘xtatdi. 17-avgust kuni ular qatoriga Air France-KLM, Lufthansa, Qatar Airways, Singapore Airlines, China Airlines va boshqa aviakompaniyalar qo‘shildi.
