Surxondaryo viloyati Sherobod tumanida 3 ta mashina ishtirokidagi yo‘l-transport hodisasi oqibatida bir kishi vafot etdi, deya xabar bermoqda viloyat YHXB.

Qayd etilishicha, 2021-yil 29-iyul kuni soat 11:30 larda Sherobod tumani “Dehqonariq” MFY hududidan o‘tuvchi mahalliy ahamiyatga ega 4R103 avtomobil yo‘lining 17-kilometrida yo‘l-transport hodisasi sodir bo‘ldi.

1998-yilda tug‘ilgan, haydovchilik guvohnomasini olganiga 1 yil bo‘lgan fuqaro Cobalt avtomashinasini boshqarib yo‘lning qarama-qarshi bo‘lagiga chiqib ketgan.

Shunda mashina qarshisidan kelayotgan Nexia’ning o‘ng tomonidan hamda shu yo‘nalishda kelayotgan Damas’ning chap tomoniga urilishi oqibatida ikki mashina ag‘darilib ketgan.

Oqibatda Damas avtomashinasida yo‘lovchi sifatida kelayotgan 1953-yilda tug‘ilgan fuqaro Sherobod tumani tibbiyot birlashmasida vafot etdi.

YTH sabablari o‘rganilishi natijasida yo‘l talabga javob bermasligi, yotiq chiqilar o‘chib ketgani aniqlangan.

Bundan avval Toshkentda beshta avtomobil oldinma-ketin to‘qnashgani, Samarqandda Lacetti katta tezlikdan yo‘l yoqasidagi uyga urilishi oqibatida haydovchi va yo‘lovchi vafot etgani hamda Andijonda Damas va ikkita Nexia ishtirokida sodir bo‘lgan YTH oqibatida 26 yoshli yo‘lovchi halok bo‘lgani haqida xabar berilgandi.