Amerikalik reper Kanye Uest Atlantadagi o‘zining to‘qqizinchi konsertida Donda albomini taqdim etgach, tadbir o‘tkazilgan Mercedes-Benz stadionida yashashga qoldi. Qo‘shiqchi u yerda plastinkasini oxirigacha yozib, yangi reliz dedlaynini buzmaslikka tayyorgarlik ko‘rmoqda, deb xabar beradi Esquire.

Foto: Getty Images for Universal Music Group

TMZ nashrining yozishicha, stadionda reper uchun studiya va yashash uchun barcha zaruriy anjomlarga ega bino qurilgan. Kanye uchun hatto shef-oshpaz yollangan. Musiqachi albomini yakuniga yetkazmaguniga qadar sport arenasida qoladi.

Atlantada taqdimot konserti 23-iyul kuni bo‘lib o‘tdi, albom relizi shundan keyin o‘tkazilishi kerak edi, biroq oxir-oqibat u 6-avgust sanasiga ko‘chirilgan. Ertasi kuni Uestni stadionda o‘tkazilgan futbol matchida payqab qolishgan. Reper konsertda kiygan kiyimida bo‘lgan. U tribunadagi muxlislar bilan videoga tushgan va uni Instagram’dagi sahifasiga joylashtirgan.

Kanye Uest o‘zining yangi albomini 2007-yilning 10-noyabrida 58 yoshida vafot etgan onasi — Donda Uest sharafiga bag‘ishlagan. Xususan, unda Donda nomli qo‘shiq ham paydo bo‘ladi. Albom yozilayotgani to‘g‘risida bundan bir yil oldin ma’lum bo‘lgan edi.

Avvalroq Netflix Kanye Uest haqidagi hujjatli filmni namoyish etish huquqini 30 million dollarga sotib olgani, film 21 yil davomida yaratilgani to‘g‘risida xabar berilgandi.