MIBning Qashqadaryo viloyati boshqarmasi 2021-yilning o‘tgan olti oyi davomida qoidabuzar haydovchilardan 6 milliard 700 million so‘m undirdi. Bu haqda “Daryo”ga boshqarma axborot xizmati rahbari Gulnoza Dilmurodova ma’lum qildi.

“Birgina, iyun oyida o‘tkazilgan reyd davomida ma’muriy jarimalarni muddatida to‘lamagan transport vositasi haydovchilari zamonaviy uskuna Autocon yordamida aniqlanib, 4 ming 646 huquqbuzardan 1 milliard 200 million so‘m qarzdorlik undirildi. 300 dan ziyod haydovchilar jarimani to‘lamagani uchun ular boshqaruvidagi transport vositalari jarima maydoniga joylashtirildi”, — deydi Gulnoza Dilmurodova.

Qayd etilishicha, MIB viloyat boshqarmasi viloyat IIB YHXB xodimlari bilan hamkorlikda viloyatning barcha hududlarida yo‘l harakati qoidalariga amal qilmagan, transport vositalaridan foydalanish jarayonida huquqbuzarlik sodir etgan va jarimalarni belgilangan muddatda to‘lamay kelayotgan haydovchilarga nisbatan tadbirlar o‘tkazgan.

“Byuroning viloyat boshqarmasi organlari ish yurituviga IIB YHXBning viloyat boshqarmasi tomonidan 40 ming 764 ta jami 10 milliard 100 million so‘mlik ijro hujjatlari kelib tushgan bo‘lib, joriy yilning o‘tgan olti oyi davomida jami 25 ming 989 ta 6 milliard 700 million so‘mlik ijro hujjatlari ta’minlanishiga erishilgan”, — deydi boshqarma axborot xizmati rahbari.

Boshqarma mas’ullari ayni kunda viloyatda bunday tadbirlar davom etayotganini aytib, haydovchilarga yo‘l qo‘yilgan qoidabuzarlik uchun jarimalarni 60 kundan kechikmay to‘lash kerakligini eslatmoqda.