Дахлсизлик ҳуқуқидан маҳрум этилган Андижон шаҳар депутати қамоққа олинди

Халқ депутатлари Андижон шаҳар кенгашининг 2021 йил 17 май куни ўтказилган навбатдаги сессиясида Андижонда ер сотувчиларнинг кирдикорларини фош қилиб юргани учун прокурор тақдимномасига кўра дахлсизлик ҳуқуқидан маҳрум қилинган депутат Шуҳрат Каримов қамоққа олинди. Бу ҳақда «Дарё»га ЎзЛиДеП партияси Андижон шаҳар кенгаши аппарат раҳбари, шаҳар кенгаши депутати Жаҳонгир Жиянов маълум қилди.

Маълум бўлишича, Жиноят ишлари бўйича Избоскан тумани судининг 2021 йил 23 июндаги ажримига мувофиқ Жиноят кодексининг 168-моддаси (фирибгарлик) 3-қисми «б» банди ва бошқа моддалар билан гумон қилувчи Андижон шаҳрида яшовчи фуқаро Шуҳрат Каримовга нисбатан қамоққа олиш эҳтиёт чораси қўлланилган.

Жаҳонгир Жияновнинг айтишича, 2021 йилнинг 20 июнь куни ижтимоий тармоқларда «Депутат 40 дақиқада Андижон шаҳар ҳокимининг барча кирдикорларини фош қилди» сарлавҳаси билан Шуҳрат Каримовнинг интервьюси жойлаштирилган. Шундан сўнг ушбу ҳолатлар юз берган.

Аввалроқ Халқ депутатлари Андижон шаҳар кенгашининг навбатдаги сессиясида бир гуруҳ депутатлар тинтувдан ўтказилгани, ушбу сессияда Андижонда ер сотувчиларнинг кирдикорларини фош қилиб юрган депутатни прокурор тақдимномасига кўра, дахлсизлик ҳуқуқидан маҳрум қилингани маълум қилинганди.

Шуҳрат Каримов «Дарё» мухбирига берган интервьюсида у халқ депутатлари Андижон шаҳар кенгашига 9-Саъдий сайлов округидан сайланган депутат сифатида қонун ва қонуности ҳужжатлар ижросини халққа етказиш ва ижросини назорат қилишга ҳаракат қилгани, шу сабабли бир қатор ташкилотларга тегишли тартибда депутатлик сўровларини юборган, бу эса мутасаддиларга ёқмаганини билдирганди.

Андижон шаҳар ҳокими Баҳром Ҳайдаров эса депутат Шуҳрат Каримов ўзига ажратилган тўрт гектар ер майдони атрофидаги қўшимча олти гектарни ҳам ноқонуний қўшиб олгани, ўзига бириктирилган ердан кўп қаватли уйлар, коттежлар, маиший хизмат бинолари қуриши керак бўлган бўлса-да, белгиланган ишлар амалга оширилмагани таъкидлаган.

Эслатиб ўтамиз, Коррупцияга қарши курашиш агентлиги прокурорнинг бундай ҳаракатини «оқлаб бўлмаслиги»ни маълум қилиб, прокурор коррупция ҳолати ҳақида хабар берган шахсни ҳимоя қилиши кераклигини таъкидлаганди.

Бундан ташқари, дахлсизлик ҳуқуқидан маҳрум қилинган депутат иши юзасидан Андижон вилояти депутатлари бу ҳолатга ўз эътирозини билдириб Президентга мурожаат қилганди.