Markaziy bank boshqaruvi 10-iyun kuni bo‘lib o‘tgan navbatdagi yig‘ilishda asosiy stavkani o‘zgarishsiz, yillik 14 foiz darajasida saqlab qolish to‘g‘risida qaror qabul qildi.
Qayd etilishicha, mazkur qaror bazaviy inflyatsiya darajasi pasayuvchi trendga o‘tgan bo‘lsa-da, ayrim tovar guruhlari bo‘yicha narxlar o‘sish sur’atlarining yuqori darajada saqlanib qolayotganligi, mamlakatda iqtisodiy va investitsion faollikning yuqori sur’atda tiklanayotganligi sharoitida yil yakuniga qadar inflyatsiyaning prognoz ko‘rsatkichlariga erishish va iqtisodiyotni qo‘llab-quvvatlash vazifalari o‘rtasidagi muvozanatni ta’minlash maqsadida qabul qilindi.
Markaziy bank boshqaruvi bundan avval, 22-aprel kuni bo‘lib o‘tgan yig‘ilishda ham asosiy stavkani o‘zgarishsiz, yillik 14 foiz darajasida saqlab qolgandi.
Eslatib o‘tamiz, 2018-yil boshida yillik stavka 14 foiz etib tasdiqlagandi. 2019-yilda ushbu stavka 16 foizgacha ko‘tarilgandi. 2020-yil mart oyida ham bazaviy stavka o‘zgarishsiz qoldirilib, 16 foiz deb belgilangandi.
Markaziy bank boshqaruvining 2020-yil 14-apreldagi qarori bilan asosiy stavka 1 foizga pasaytirilib, yillik 15 foiz darajasida belgilangan edi. Iyun oyida esa Markaziy bank asosiy stavkani pasaytirishi haqida xabarlar tarqaldi, biroq 11-iyun kuni asosiy stavka bo‘yicha qaror qabul qilingan va u 15 foiz miqdorida o‘zgarishsiz qoldirilgandi.
2020-yil 10-sentabr kuni Markaziy bank boshqaruvi asosiy stavkani 1 foizga pasaytirib, 14 foiz etib belgiladi. Shundan buyon asosiy stavka yillik 14 foiz darajasida o‘zgarishsiz qoldirilmoqda.
