Shavkat Mirziyoyev Surxondaryoda tomorqa egalariga 15-20 sotixdan yer berilishini ma’lum qildi

Davlat rahbari ikki oy muddatda unumdorligi past bo‘lgan g‘alladan bo‘shaydigan maydonlardan tomorqa yer egalariga sabzavot-poliz mahsulotlari yetishtirish uchun o‘rtacha 15-20 sotixdan 10 yil muddatgacha ijaraga berishning huquqiy asoslarini ishlab chiqish bo‘yicha ko‘rsatma berdi.

“Viloyatda tomorqadan samarali foydalanish bo‘yicha xonadon egasi – tayyorlovchi korxona – qayta ishlovchi va eksportyorlarni bog‘lovchi tizim yaratamiz”, – dedi Prezident.

60 ta sektorning har birida tomorqada mahsulot yetishtiruvchi xonadonlarni klasterlar bilan bog‘lovchi tayyorlovchi korxonalar tashkil etiladi.

Tayyorlovchi korxonalar tomorqa yer egalaridan yetishtirilgan mahsulotni sotib olib, saralab, klasterlarga eksport qilish va qayta ishlash uchun beradi.

Prezident bosh vazir o‘rinbosari Sardor Umurzoqovga klasterlar tomonidan tomorqada yetishtirilgan mahsulotlarni tashqi bozorlarda sotishni tashkil etish uchun Rossiyadagi elchixona va vakolatxonalarda Surxondaryo viloyati vakillari faoliyatini yo‘lga qo‘yish bo‘yicha topshiriq berdi.

Ushbu tizimni tashkil qilish uchun Tiklanish va taraqqiyot jamg‘armasidan 1 trillion so‘m mablag‘ ajratiladi.

Bundan avval Shavkat Mirziyoyev Surxondaryoda yangi institut faoliyati yo‘lga qo‘yilishini ma’lum qilgani, Hakim at-Termiziy maqbarasini ziyorat qilgani hamda deputatlarni faollikka chaqirgani haqida xabar berilgandi.