Jizzax viloyatining Sharof Rashidov tumanidan o‘tgan M-39 avtomobil yo‘lida Howo yuk mashinasi tormozi ishlamay qolgani sabab bir nechta yengil avtomobillarga urilib, yo‘l-transport hodisasini sodir etdi. Bu haqda viloyat IIB axborot xizmati xabar berdi.
Ma’lum qilinishicha, 17-may kuni soat 22:45 larda Toshkent—Termiz avtomobil yo‘li orqali harakatlanib ketayotgan buxorolik haydovchi boshqaruvidagi Howo yuk mashinasining tormoz qismi ishlamay qolgan. Oqibatda yuk avtomobili oldinda harakatlanib ketayotgan 3 ta Nexia hamda Lacetti mashinalarining orqa qismiga borib urilgan.
Yengil avtomobillar salonida bo‘lgan Qashqadaryo, Samarqand va Jizzax shahrida yashovchi 8 nafar fuqaro tan jarohatlari bilan Respublika shoshilinch tibbiy yordam ilmiy markazi Jizzax filialiga yotqizilgan.
Qayd etilishicha, hududda xizmat olib borayotgan viloyat IIB YHXB inspektori Howo yuk mashinasining oldida ogohlantirish signali bilan harakatlanib, boshqa avtoulovlarning yo‘l chetiga chiqishi to‘g‘risida ogohlantirib borgan. Bu esa o‘z navbatida boshqa yo‘l-transport hodisalarining oldini olish va insonlar hayotini saqlab qolishga xizmat qilgan.
Avvalroq Sirdaryoda maktab oldidagi piyodalar yo‘lagidan o‘tayotgan 2-sinf o‘quvchisi yuk mashinasi urib ketishi oqibatida vafot etgani, Samarqandda turkiyalik haydovchi boshqaruvidagi Volvo yuk mashinasi piyodani urib yuborgani to‘g‘risida xabar berilgandi.
