Namanganda 2021-yil aprel oyi oxirida viloyatlarda ilk bor buyrak ko‘chirib o‘tkazish amaliyotlari o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Bunga qadar buyrak transplantatsiyasi operatsiyasi faqat Toshkentda, Respublika shoishilinch tibbiy yordam ilmiy markazi va V. Vohidov nomidagi respublika ixtisoslashtirilgan jarrohlik ilmiy-amaliy tibbiyot markazida amalga oshirilardi.
Dastlabki operatsiya qariyb uch soat davom etdi. Chortoq tumanida yashovchi Yoqutxon Mutaliyeva 21 yoshli qizi Dilnoza Ahmadjonovaga buyragini berdi.
Operatsiya stoliga yotqizilgan yana bir bemor poplik 30 yoshli temiryo‘l ishchisi Muhriddin Mahkamov bo‘ldi. Unga akasi Murodjon Mahkamov donorlik qildi.
Yangiqo‘rg‘on tumanining G‘ovazon qishlog‘ida yashovchi Javohir Ergashevning joniga esa turmush o‘rtog‘i Naima Qayumova oro kirdi. U erining qurigan buyragi o‘rniga o‘ziniki ko‘chirib o‘tkazilishiga erishdi.
“Yuragimni so‘rashganda ham bergan bo‘lardim. Chunki bu bilan o‘zim sevgan insonning hayotini saqlab qolayapman, ayollik burchimni bajaryapman. Agar shunday qilmaganimda bir umr vijdonim qiynalib o‘tgan bo‘lardi”, — deydi Naima.
Javohir va Naima 24 yoshda. Biri usta, ikkinchisi go‘zallik saloni xodimasi. Maktabda va kollejda birga tahsil olishgan. 7 yil davomida sevishib, bir-birlarini sinab, bundan uch yil avval turmush qurishgan. Xushnudbek ismli 2 yashar o‘g‘illari bor.
Javohir bundan 1,5 yil avval o‘zida kasallik alomatlarini payqagan. Tekshiruvlar davomida uning ikki buyragi ham qurigani ma’lum bo‘lgan. Shundan so‘ng gemodializ apparatiga ulangan holda kun ko‘rishga majbur bo‘lgan.
“Tushkunlikka tushib qoldim, kechalari bilan yig‘lab chiqardim. Yoshman, yashagim keladi. Yaqinlarim, turmush o‘rtog‘im, endi tetapoya bo‘layotgan bolamga ko‘zim qiymaydi. Akalarim buyragini bermoqchi bo‘ldi, lekin ularniki mos kelmadi”, — deya hikoya qiladi Javohir.
Naimaning aytishicha, eriga aynan u donor bo‘lishi mumkinligini boshidan ko‘ngli sezgan va shifokorlarga murojaat qilgan.
“Bizni qayta-qayta tekshirishdi, ‘qarindosh bo‘lasizlarmi’ deb hayratlanishdi. Chunki buyragimiz, qonimiz 100 foiz to‘g‘ri kelibdi, hech qanday mone’lik yo‘q ekan. Meni bundan qaytarmoqchi bo‘lgan, ‘qo‘y, o‘zing yarimjon bo‘lib qolasan’ deb nasihat qilganlar ko‘p bo‘ldi. Lekin shashtimdan qaytmadim, Allohga tavakkal qildim”, — deydi Naima Qayumova.
Naima turmush o‘rtog‘i uzoq vaqtlardan beri endi tinch uxlayotgani, dard va og‘riqlari chekinganini aytmoqda. Buyrak yangi tanaga moslashib ketishi uchun esa yana biroz muddat talab etilishini ta’kidlaydi.
Asosiysi, yosh oila kelajakka umid bilan qaramoqda. Ularning o‘g‘illari Xushnudbekning bo‘lajak kasbi borasidagi niyatlari ham allaqachon dilga tugilgan: u, albatta, nefrolog — buyraklarni davolashga ixtisoslashgan shifokor bo‘ladi.
Izoh (0)