O‘zbekistonda “Reklama to‘g‘risida”gi yangi qonun bilan tarkibida shakar, tuz va yog‘ miqdori yuqori bo‘lgan oziq-ovqat mahsulotlarini reklama qilishni taqiqlash ko‘zda tutilmoqda.

Ushbu qonun loyihasi Oliy Majlis Qonunchilik palatasining 4-may kuni o‘tkazilgan navbatdagi majlisida deputatlar tomonidan birinchi o‘qishda qabul qilindi.

Eslatib o‘tamiz, Shavkat Mirziyoyevning 30-oktabrdagi “Sog‘lom turmush tarzini keng tatbiq etish va ommaviy sportni yanada rivojlantirish chora-tadbirlari to‘g‘risida”gi farmoni bilan Vazirlar Mahkamasiga uch oy muddatda tuz, qand va yog‘ miqdori me’yoridan ortiq bo‘lgan oziq-ovqat mahsulotlarining reklamasiga quyidagi cheklovlar o‘rnatishni nazarda tutuvchi qonun loyihasini ishlab chiqish yuklatilgandi:

  • ta’lim, sog‘liqni saqlash va sport muassasalari hududida hamda jamoat transportida reklama qilish;
  • bolalar, animatsion personajlar va bolalar ko‘rsatuvlari qahramonlari ishtirokida reklama qilish;
  • ommaviy axborot vositalarida bolalar uchun mo‘ljallangan ko‘rsatuvlardan 30 daqiqa oldin va keyin namoyish qilish.

O‘zbekistonda 2021-yil 1-iyuldan tuz, shakar va yog‘ miqdori yuqori bo‘lgan mahsulotlar, shuningdek, sog‘liq uchun zararli boshqa qo‘shimchalar mavjud mahsulotlarni markirovka qilish joriy etiladi.