O‘zbekistonda 3-may kuni jami 55 795 nafar kishi COVID-19 ga qarshi emlandi, deya xabar beradi Sog‘liqni saqlash vazirligi matbuot xizmati. Shulardan 47 816 nafari birinchi bosqichda, 7979 nafar fuqaro esa ikkinchi bosqichda emlangan.

1-maydan boshlab vaksinaning birinchi bosqichini olgan fuqarolarni uning ikkinchi dozasi bilan ham emlash boshlandi. Hozirgi kungacha O‘zbekistonda koronavirus infeksiyasiga qarshi emlangan fuqarolar soni 911 811 nafarga yetgan. Ularning 14 285 nafari ikkinchi bosqichda emlanganlardir.

3-may kunidagi emlash ko‘rsatkichlari bo‘yicha yuqori o‘rinlarni

• Andijon viloyati (8677 nafar),
• Samarqand viloyati (7214 nafar),
• Namangan viloyati (6207 nafar),
• Toshkent shahri (6168 nafar) band qildi.

Koronavirusga qarshi emlangan jami aholi soni

• Farg‘ona viloyatida 126 027 nafar,
• Andijon viloyatida 99 797 nafar,
• Namangan viloyatida 98 310 nafar,
• Samarqand viloyatida 91 887 nafarni tashkil qilmoqda.

Eslatib o‘tamiz, 1-maydan O‘zbekistonda vaksinatsiyaning ikkinchi oyi boshlandi. Vaksinatsiyaning birinchi bosqichi 1-apreldan boshlangandi. Dastlabki bosqichda 65 yoshdan kattalar, surunkali kasalligi borlar, tibbiyot va ta’lim muassasalari (maktab va bog‘cha) xodimlari, shuningdek, huquq-tartibot organlari vakillari emlangandi.