Toshkentda Xalqaro xotin-qizlar kuni munosabati bilan “Ayollar yetakchi lavozimlarda: COVID-19 pandemiyasi sharoitida teng huquqli kelajakka erishish” mavzusida davra suhbati bo‘lib o‘tdi, deb xabar bermoqda “Gazeta.uz” BMT Taraqqiyot dasturiga tayanib.
Xabarda aytilishicha, unda Oliy Majlis Senati raisi Tanzila Norboyeva nutq so‘zlab, O‘zbekistonda xotin-qizlarning ijtimoiy himoyasi haqida so‘z yuritdi.
“‘Ayollar daftari’ bo‘yicha 6 million nafardan ortiq ayol bilan bevosita suhbatlar o‘tkazildi va og‘ir ahvoldagilari bu daftarga kiritildi. ‘Xalq banki’ ‘Ayollar banki’ga aylandi, deb aytishimiz mumkin. Chunki ayollarni qo‘llab-quvvatlash shu bank orqali amalga oshirilmoqda va buning uchun qo‘shimcha 1 trillion so‘m mablag‘ ajratildi. Xorijiy hamkorlarimiz ham 2,7 million dollar miqdorida grant beryapti”, — deya ta’kidlagan u.
Tanzila Norboyeva oliy ta’limda qizlar sonini oshirish masalasiga ham to‘xtalgan.
“Bu yil ehtiyojmand oilalarning 2 ming nafar qizi oliy ta’lim muassasalarida bepul o‘qitiladi, o‘tgan yili ularning soni 950 nafar edi. Bu sonni oshirib borish masalasi shaxsan davlat rahbari nazoratida turibdi. Biz oliy ta’lim oluvchilar orasida qizlarni 50 foizga yetkazishga harakat qilishimiz kerak”, — deb ta’kidlagan Senat raisi.
Eslatib o‘tamiz, Shavkat Mirziyoyev 29-dekabr kuni Oliy Majlisga yo‘llagan Murojaatnomasida islohotlarning ustuvor yo‘nalishlaridan biri ayollarning davlat va jamoat boshqaruvidagi rolini yanada oshirish ekanini aytib o‘tgandi. “Mamlakatda yashovchi 17 milliondan ziyod ayol — qizlarimiz, onalarimiz va buvilarimiz uchun munosib turmush sharoitlarini yaratish uchun qo‘limizdan kelgan barcha ishni amalga oshirishimiz lozim”, — degan edi Prezident.
Davlat rahbari “hayotni va ayollar muammolarini yaxshi biladigan, faol va tashabbuskor ayollardan iborat” Respublika xotin-qizlar jamoatchilik kengashini tashkil etishni va unga Senat raisi Tanzila Norboyevaga rahbarlik qilishni taklif qilgandi.
Murojaatnomada, shuningdek, ayollarning biznes loyihalarini qo‘llab-quvvatlash hamda joylarda aniqlangan xotin-qizlar muammolarini hal qilish uchun budjetdan qo‘shimcha ravishda 1 trillion so‘mdan ortiq mablag‘ ajratilishi aytilgan.
Prezidentining “2020/2021-o‘quv yilida O‘zbekiston Respublikasining oliy ta’lim muassasalariga o‘qishga qabul qilishning davlat buyurtmasi parametrlari to‘g‘risida”gi qaroriga ko‘ra, xotin-qizlarning OTMga kirishida qo‘shimcha to‘rt foizli davlat granti asosida kvota ajratilgandi.
Izoh (0)