Qozog‘istonning O‘zbekistondagi elchisi xitoy—o‘zbek vaksinasi bilan emlandi

1-mart kuni Innovatsion rivojlanish vaziri Ibrohim Abdurahmonov Qozog‘istonning O‘zbekistondagi elchisi Darxan Satibaldini qabul qildi. Tomonlar O‘zbekistonda koronavirus pandemiyasiga qarshi kurash bo‘yicha amalga oshirilayotgan ishlar va bu borada hamkorlikni kuchaytirish masalasini muhokama qilgan.

Uchrashuvda innovatsion rivojlanish vaziri O‘zbekiston—Xitoy hamkorligida amalga oshirilayotgan ZF-UZ-VAC2001 vaksinasining sinov jarayonlari haqida ma’lumot bergan. Xususan, vazirlik huzuridagi Ilg‘or texnologiyalar markazi, Sog‘liqni saqlash vazirligi huzuridagi Virusologiya ilmiy-tadqiqot instituti va Xitoy farmkompaniyasi bilan uch tomonlama memorandum doirasidagi III faza sinovlarida mazkur vaksinaning xavfsizligi yuqori baholanganini qayd etgan.

Ma’lum qilinishicha, bugungi kunga kelib 6836 nafar ko‘ngilli vaksinaning 1-dozasi, 4453 nafar ko‘ngilli vaksinaning 2-dozasi va 283 nafar ko‘ngilli 3-doza bilan emlangan. Ushbu sinovda qatnashgan fuqarolarning 6 nafaridagina ozroq nojo‘ya ta’sir – allergik reaksiya kuzatilgan. Bu 0,01 foiz bo‘lib, vaksinaning xavfsizligidan dalolat beradi.

Darxan Satibaldi O‘zbekiston va Xitoy davlatlari hamkorligida yaratilgan ZF-UZ-VAC2001 yangi rekombinant vaksina sinovlari muvaffaqiyatli o‘tayotgani bilan qutlagan. Shuningdek, ushbu vaksina borasida Qozog‘iston ommaviy axborot vositalarida ham materiallar berilayotgani haqida gapirgan. Elchi O‘zbekiston—Xitoy vaksinasini Qozog‘istonga ham yetkazish masalasini muhokama qilish bo‘yicha taklif tayyorlashini bildirib o‘tgan.

Suhbat yakunlangach, Qozog‘iston elchisi Darxan Satibaldi va ikki nafar Qozog‘iston elchixonasi xodimi ZF-UZ-VAC2001 vaksinaning 1-dozasi bilan emlangan.

Avvalroq O‘zbekistonda ZF-UZ-VAC 2001 vaksinasi birinchi bo‘lib foydalanish uchun ro‘yxatdan o‘tkazilgani to‘g‘risida xabar berilgandi.

Eslatib o‘tamiz, O‘zbekistonda koronavirusga qarshi emlash mart oyining birinchi yarmida boshlanishi ma’lum qilingan. Maxsus komissiya qaroriga ko‘ra, O‘zbekistonda Rossiyaning Gamaleya ilmiy-tadqiqot markazi tomonidan ishlab chiqilgan “Sputnik V” vaksinasini qo‘llashga ruxsat berildi. Koronavirusga qarshi kurashish tadbirlari va vaksina uchun 3 trillion so‘m ajratish rejalashtirilgan.