Buyuk Britaniya kompaniyalarining xodimlari ommaviy ravishda ishdan bo‘shatilishi mumkin

Agar Buyuk Britaniya Moliya vazirligi majburiy mehnat ta’tilini davlat tomonidan moliyalashtirish dasturini uzaytirmasa, mamlakatning har to‘rtinchi kompaniyasi xodimlarini ishdan bo‘shatishi mumkin. Bu haqda mamlakat Savdo-sanoat palatasi ma’lumotiga tayanib Reuters xabar berdi.

Xabarga ko‘ra, Buyuk Britaniya moliya vaziri Rishi Sunak yillik budjetni 2021-yil 3-martgacha taqdim etishi kerak. Koronavirus pandemiyasi paytida majburiy ta’tilga yuborilgan xodimlarning ish haqini davlat tomonidan moliyalashtirish dasturi mart oyining oxirida tugaydi.

Savdo-sanoat palatasi ma’lumotlariga ko‘ra, mamlakatdagi kompaniyalarning qariyb 25 foizi o‘z xodimlarini qisqartirishga majbur bo‘ladi va barcha kompaniyalarning to‘rtdan biri xodimlarning ish vaqtini qisqartirishni rejalashtirmoqda. Ilgari davlat moliyalashtirish dasturining sxemasiga binoan, xodim majburiy ta’tilda bo‘lgan taqdirda oyiga 2500 funt sterlingdan ko‘p bo‘lmagan miqdorda davlatdan o‘rtacha ish haqining 80 foizini olgan.

Shu sababli ushbu dastur davlat tomonidan iqtisodiy qo‘llab-quvvatlashning eng qimmat chora-tadbiriga aylandi va bu Buyuk Britaniya hukumatiga 46 milliard funt sterling (64 milliard dollar)ga tushdi. Buyuk Britaniyaning Milliy statistika idorasi ma’lumotlariga ko‘ra, karantin mobaynida xususiy sektor xodimlarining qariyb 18 foizi mehnat ta’tilida bo‘lgan.

BCC World News tomonidan o‘tkazilgan so‘rovga ko‘ra, 2020-yilning oktabr oyidan beri Buyuk Britaniya firmalarining 61 foizida sotuvlar rekord darajada pasaygan.

Avvalroq “Breksit” sabab Britaniyaning 50 ga yaqin kompaniyasi Fransiyaga ko‘chib o‘tgani haqida xabar berilgandi. Pandemiyaga qaramay, allaqachon deyarli 2,5 ming ish o‘rni Buyuk Britaniyadan Fransiyaga o‘tkazilgan. 2020-yil oxiriga qadar kamida 170 milliard yevrolik aktivlarni boshqaradigan 50 ga yaqin ingliz tashkilotlari Fransiyaga ko‘chib o‘tgan. 2021-yilda bunday transferlar tezlashishi kutilmoqda.

Eslatib o‘tamiz, koronavirus pandemiyasi sababli yuzaga kelgan iqtisodiy inqiroz butun dunyoda 250 million kishini ishsiz qoldirdi. Mazkur ko‘rsatkich 2008—2009-yillardagi moliyaviy inqirozga qaraganda to‘rt baravar ko‘p.