Navoiydagi omborxonada yuzaga kelgan yong‘in 8,5 soatdan so‘ng bartaraf etildi

Favqulodda vaziyatlar vazirligi Navoiy viloyatida joylashgan omborxonalardan birida yuzaga kelgan yong‘in bo‘yicha rasmiy ma’lumot berdi.

Ma’lum qilinishicha, 31-yanvar kuni soat 22:07 da Navoiy viloyati FVB (favqulodda vaziyatlar boshqarmasi) navbatchilik qismiga Navoiy shahrida joylashgan “Baxt tekstil” MChJ korxonasi omborxonasida yong‘in sodir bo‘lgani to‘g‘risida xabar kelib tushgan. Holat yuzasidan zudlik bilan Navoiy shahar FVB yong‘in-qutqaruv ekipajlari soat 22:10 da voqea joyiga yetib borgan.

Olib borilgan sa’y-harakatlar natijasida yong‘in soat 22:30 da qurshab olinib, 1-fevral kuni soat 07:05 da to‘liq bartaraf etilgan.

Hodisa joyiga 13 maxsus texnika hamda yong‘in-qutqaruv ekipajlari, “Tinchlik” yong‘in o‘chirish poyezdi jalb etilgan.

“Ushbu holatda vafot etgan va jarohat olganlar yo‘q. Yong‘inning kelib chiqish sababi va moddiy zarar aniqlanmoqda. Ayni vaqtda vaziyat yuzasidan tergovoldi surishtiruv ishlari olib borilmoqda”, — deyiladi xabarda.

Avvalroq Farg‘onaning O‘zbekiston tumanidagi bozorda yong‘in sodir bo‘lgani, Asakadagi kiyim-kechak bozorida yong‘in yuz bergani, shuningdek, Toshkentda Jomiy bozori yaqinidagi bir nechta qurilish do‘konlarida yong‘in kelib chiqqani to‘g‘risida xabarlar berilgandi.