“O‘pkani MSKT qildirish narxining sun’iy oshirilganini tekshirishga Biznes-ombudsman rad javobini bergan” – MQKQ rasmiysi

Pandemiya davrida o‘pkani MSKT qildirish narxining uch-to‘rt barobarga oshishiga kasallarning ko‘payishini sabab qilib ko‘rsatish hech qanday iqtisodiy qoidalarga to‘g‘ri kelmaydi. Bu haqda 7-dekabr kuni AOKAda o‘tkazilgan matbuot anjumanida so‘z bordi, deya xabar bermoqda “Daryo” muxbiri Mirolim Isajonov.

Monopoliyaga qarshi kurashish qo‘mitasi raisining birinchi o‘rinbosari Bobur Karimovning fikricha, narxlarning oshishi tibbiyot muassasalari rahbarlari tomonidan o‘ylab chiqilgan.

“Pandemiyadan oldin MSKT narxi o‘rtacha 100 ming so‘m edi. Pandemiya boshlanganidan keyin esa 300-400 ming so‘m atrofida bo‘ldi. Biz tadbirkorlar, ya’ni tibbiyot muassasalari bilan suhbatlashganimizda ular “Kasallar soni oshib ketdi, 24 soat faoliyat yurityapmiz, shu bois narxini ko‘targanmiz”, degan fikrlarni aytishgan. Lekin kasallarning ko‘payishi narx oshirishga asos bo‘lolmaydi. Bu narsani hech bir iqtisodiy kitobda ko‘rmaysiz va bu hech qanaqa iqtisodiy qoidalarga mos kelmaydi. Buni tibbiyot muassasalarining o‘zi o‘ylab chiqqan, deb o‘ylaymiz”, — dedi Karimov.

Uning ta’kidlashicha, qo‘mitaning narxlarni tekshirish borasidagi murojaatini Biznes-ombudsman rad etgan.

“Narxlarni tekshirish maqsadida tadbirkorlarni himoya qiladigan Biznes-ombudsmanga ham murojaat qilganmiz. Ammo biz ulardan rad javobini oldik va hayron qoldik. Ya’ni Biznes-ombudsman tekshiruv o‘tkazmasdan turib, o‘zi xulosa chiqarib qo‘ydi. “Bu yerda qonun buzilish holati yo‘q, hammasi asoslangan, deb o‘ylaymiz va sizlarga tekshirishga ruxsat bermaymiz”, degan javobni berishdi. Shuning uchun biz ham qonunga qarshi borolmaymiz, o‘zimizdan o‘zimiz tekshiruvlarni o‘tkaza olmaymiz.

Biz pandemiya paytida tibbiyot muassasalarida qandaydir xarajatlar ko‘payganiga ishonamiz. Lekin narxni to‘rt barobarga oshishiga sabab bo‘ladigan xarajat ko‘paygan, deb o‘ylamaymiz. Tibbiyot muassasalarini tekshirishga ruxsat berilsa, shifoxonalarga borib hujjatlarni ko‘taramiz va narxning oshishi qanchalik asoslanganligiga oydinlik kiritamiz. Shundan so‘ng biz aniq xulosa bera olamiz. Biroq hozircha bizning shubhamiz bor, ammo isbotimiz yo‘q. Chunki tekshiruv o‘tkazmaganmiz”, — dedi qo‘mita rasmiysi.