Olimlar minglab Apple Watch yordamida karantin “ovozi”ni o‘lchadi

Koronavirus pandemiyasi sabab butun dunyoda joriy etilgan karantin davlatlar iqtisodiyotiga jiddiy zarar yetkazmoqda. Biroq yangi koronavirus ayrim hollarda sayyoraga ijobiy ta’sir ham ko‘rsatyapti. Yirik korxonalar atmosferaga chiqariladigan zararli gazlar miqdorini kamaytirgan, ko‘plab shaharlarda shovqin darajasi sezilarli darajada tushib ketgan, deb yozadi Hi-Tech.Mail.ru.

Michigan universiteti tadqiqotchilari 5894 kishining Apple Watch va iPhone qurilmalaridagi shovqin darajasiga oid ma’lumotlarni o‘rganib chiqdi. Ma’lum bo‘lishicha, mart va aprel oyida shovqinning o‘rtacha sutkalik darajasi 2020-yilning yanvar hamda fevraliga qaraganda 3 detsibelga (dB) pasaygan. Karantin boshlanguniga qadar uning darajasi 73,2 dB bo‘lgan, undan keyin esa — 70,6. Ekspertlarning ta’kidlashicha, 70 dB dan yuqori ovoz insonning eshitish qobiliyatiga salbiy ta’sir ko‘rsatadi.

Olimlarning fikricha, virusning ko‘plab salbiy oqibatlariga qaramay, umumiy shovqinning pasayishi — insonlar sog‘lig‘i uchun foydali. Muntazam shovqin eshitish qobiliyatini yomonlashtiradi, yurak qon-tomir kasalliklarini yuzaga keltiradi.

Olimlar tomonidan o‘rganilgan ma’lumotlar AQShning to‘rtta shtatida istiqomat qiluvchi fuqarolarga tegishli va shovqin darajasi har bir hududda joriy etilgan karantin cheklovlariga bog‘liq. Xususan, ularning ayrimlarida boshqa shtatlar yoki davlatlarga qaraganda qattiqroq cheklovlar o‘rnatilgan edi. Masalan, Nyu-York va Kaliforniyadagi cheklovlar uzoq vaqt davom etdi.